Ang Pagsusuri Kung Papaano Pinapahalagahan ng mga Estudyante ang
El Filibusterismo sa Asignaturang Filipino

I. Panimula A. Saligan ng Pag-aaral Ang El Filibusterismo ay ang ikalawang nobela na nilikha ni Dr. Jose Rizal na buong puso niya inialay sa mga paring martir na sina Gomez, Burgos, at Zamora o mas kilala bilang “Gomburza”. Sinundan nito ang Noli Me Tangere na sumasalamin sa mga kaganapan noong panahon ng pananakop ng mga Kastila at ang nagmulat sa mga Pilipino sa kanilang pansariling kahinaan at kamalian sa kabila ng masamanang pagmamaltrato nito sa kanila. Samantalang ipinakita naman sa El Filibusterismo ang paraan kung papaano nararapat gawin ang isang himagsikan. Ipinakita rito ang ginawang paghihiganti ni Crisostomo Ibarra (ang pangunahing tauhan sa dalawang nobela) sa lipunan na kanyang ginagalawan sa katauhan ni Simoun. Makikita din dito ang pagkabigo ni Crisostomo sa lahat ng kanyang mga balak, ngunit ito ang mas nagpatatag sa kanya upang mas lalong hindi sumuko. Sa El Filibusterismo nasagot ang mga katanungan ukol sa nagyari sa mga taong kagaya nina Crisostom, Basilio, Maria Clara, Sisa, at iba pa. Isinulat ni Dr. Jose Rizal ang El Filibusterismo upang masagot at mabigyan linaw ang mga bagay-bagay na hindi depenido sa unang nobela. Tinutukoy din dito ang kahalagahan ng etika at kagandahan asal laban sa kasakiman. Ito ang akdang nagpasiklab sa damdamin ng mga Pilipino na matamo ang hinahangad na kalayaan at karapatan ng bayan na ipinagkait ng mga Kastila sa loob ng mahabang panahon. Ang El Filibusterismo ay isinulat ni Dr. Jose Rizal hindi para maghiganti sa mga Kastila, isinulat niya ito para sa kapakanan ng kanyang lahi.
B. Layunin * Ang layunin ng pag-aaral na ito ay upang makatulong sa pagkukumbinse sa mga kabataan na magbasa ng mga akdang isinulat ni Rizal. * Mabuksan ang isipan ng mga kabataan sa buhay, mga isinulat, at mga ginawa ni Dr. Jose Rizal para sa ating bansa ng makapagbigay inspirasyon at pagkaunawa. * Makapaglahad ng mga rason kung bakit kailangan natin pahalagahan at tangkilikin ang nobelang El Filibusterismo. * Makapagbahagi sa mga kabataan ng kaunting kaalaman tungkol sa likod ng El Filibustrismo. * Maihalintulad ang mga pangyayari sa El Filibusterismo sa kasalukuyang panahon.

C. Paglalahad ng Suliranin Sa kasalukuyan, maraming mga kabataan ang tila wala ng interes sa pagbabasa o pagtatangkilik sa panitikang Pilipino. Masyado ng naimpluwensiyahan ng mga bagay-bagay sa loob at labas ng bansa ang mga kabataan. Ilan sa mga halimbawa na humahadlang sa kanilang pagbabasa ay ang mga makabagong teknolohiya, mga tao sa kanilang paligid, at pati na rin ang kanilang sarili. Ang mga nobela ni Dr. Jose Rizal ang naging daan tungo sa kalayaan nating mga Pilipino sa kamay ng mga Kastila, ngunit binabalewala na lamang ito ng mga tao ngayon. Kakaunti na lamang ang mga kabataang patuloy na tumatangkilik sa mga nobelang ito sa kadahilanang mahaba at mahirap ang mga itong intindihin dahil sa lalim ng mga salitang nakalimbag dito. Ang El Filibusterismo ay isang nobelang makaluma at pampulitika kaya naman hindi ito tinatangkilik ng mga kabataan sa panahon ngayon. Mas gusgustuhin kasi nilang basahin ang mga akdang pumupukaw sa kanilang interes at kung saan maiuugnay nila ang kanilang mga sarili at buhay.

D. Kahalagahan ng Pag-aaral Isa sa mga dahilan ang nobelang El Filibusterismo kung bakit namulat ang mga Pilipino na ipaglaban ang kanilang karapatan at kalayaan mula sa mga Kastila. Masasabi ko na ang pag-aaral sa mga akda ni Dr. Jose Rizal ay dapat parin ipagpatuloy dahil marami itong magagandang aral at katotohanan na dapat nating mga Pilipino na malaman. Dahil sa pag-aaral na ito mabibigyan ng kahalagahan at kalinawan ang nobela. Tinutulungan nito ang isang mambabasa na malaman ang kahalagahan ng nobela sa bawat isa sa atin. Ang pag-aaral na ito ang siya ring tutulong upang maging bukas ang isipan at maging aktibo sa lahat ng mga bagay-bagay ang bawat isa ukol sa ating lipunan sa kasalukuyan. Si Dr. Jose Rizal at ang kanyang mga akda ay mga yamang ibinigay sa ating mga Pilipino, kaya dapat nating pahalagahan at alagaan ang mga ito. Hanggang ngayon, ang mga nobelang ito ay nagsisilbing palatandaan sa mga nangyari nung nakaraan. Napakaraming matututunan sa mga nobelang ito, tulad ng mga ideya sa reporma, rebolisyon, nasyonalisasyon at kasaysayan. Ang mga akda ni Dr. Jose Rizal ang magtataguyod sa ating pagiging makabayan at makatotohanan sa ating bansang hinirang hanggang sa kinabukasan.