Paninindigan para kay Inang Bayan

Binubuo ng tatlong sangay ang pamahalaan – ehekutibo, lehislatibo, at hudikatura. Layunin ng istrukturang ito na tiyaking na ginagawa ng magkakahiwalay na sangay ang kanilang tungkulin. Isa rin paraan upang matiyak na hindi sentralisado ang kapangyarihang tangan ng pamahalaan. Nakalulungkot na pinaniniwalaang sangkot sa iba’t ibang kaso ng katiwalian ang mga lingkod-bayad. Higit pa rito, mistulang isinasantabi ang linyang naghahati sa tatlong sangay ng pamahalaan.
Mistulang teleseryeng sinubaybayan ng taumbayan ang mga pangyayari sa pork barrel scam. Mula sa paglantad ni Benhur Luy, pagkakadawit ng ilang mga senador, at pagsuko at pagkakakulong kay Janet Napoles. Ikinagalit ng maraming Pilipino ang pagbulsa ng ilang mambabatas sa perang pinaghirapan ng mga manggagawang Pilipino. Naglunsad ng ilang pagtitipon ang ilang sa ating mga kababayan upang tuluyang tanggalin ang pork barrel. Sa pagtindi ng kontrobersya, sinuportahan ni Pangulong Benigno Aquino III ang pagbuwag sa Priority Development Assistance Fund (PDAF) at pagbuo ng bagong mekanismo sa pamamahala ng pondo. Hati ang saloobin ng mga eksperto hinggil sa hakbanging ito mistulang pagpapalit lamang ito ng pangalan upang humupa ang init ng ulo ng taumbayan?
Sa pagkakadawit ni Senador Jinggoy Estrada bilang isa sa mga nangulimbat sa kaban ng bayan, inihayag niya ang pamamahagi ng tanggapan ng pangulo ng salapi pagkatapos ng impeachment ni Renato Corona. Kapansin-pansin na mas malaki ang pondong ipinagkaloob sa mga senador na nagpatalsik kay Corona, mistulang pabuya sa kanilang pakikiisa. Bilang depensa, sinabi ni Presidential Spokesman Edwin Lacierda na dagdag pondo ito at galing sa Disbursement Acceleration Program (DAP). Sadyang napapanahon nga naman ang dagdag pondong ipinagkaloob ng pangulo? Mistulang pagbubunyi ba ito sanhi ng katuparan ng kanyang mga plano?
Sangkot din ang ilang kagawaran sa isyu ng korupsyon. Mainit na usapin ngayon ang maanomalyang pamamahagi ng Malampaya Fund ng administrasyong Arroyo. Sa ulat ng Commission on Audit, 14.393 bilyong piso ang inilabas mula sa pondo bilang special allotment release orders (Saros). Sa katunayan, nagkaroon ng dagdag pondo ang Department of Budget and Management (DBM) sa ilalim ni Rolando Andaya sanhi ng Saros. Nakasaad sa Presidential Decree (PD) No. 910 na maaaring gamitin ang kita mula sa Malampaya sa pagpopondo ng paglinang sa mga pagmumulan ng yamang enerhiya at iba pang gawaing alinsunod sa utos ng pangulo. Hindi naman tugma sa probisyon sa PD 910 ang dagdag pondong natanggap ng DBM, hindi ba’t may pondong inilalaan sa kanila mula sa napagkasunduang badyet ng Kongreso?
Sa gitna ng mga pangyayaring ito, daing ng mga mamamayan na maparusahan ang mga nagkasala at makamit ang hustisya. Malaking papel ang gagampanan ng sangay ng hudikatura. Isang sangay na minsan ding binalot ng kontrobersya at kasalukuyang ibinabalik ang tiwala ng taumbayan. Pag-asa ang tangan ni Juan sa pagdulog nito sa korte – umaasang mananagot ang mga lumustay sa bawat sentimong pinaghirapan ng mga manggagawang Pilipino. Isang hamon sa hudikaturang ibalik ang pangunahing layunin ng pagkakaroon ng tatlong sangay sa pamahalaan. Isang malaking hamon sa kanilang patunayang patas ang pagpapatupad ng batas, wala kinikilingan at hindi nababayaran.
Ilang ulit nang tinawid ang linyang naghihiwalay sa ehekutibo at lehislatibo, kailan mabibigyang-aksyon ang paglabag na ito? Isang paninindigan para kay Inang Bayan ang masusing paglilitis at pagpapatalsik sa mga buwayang nakaupo sa pamahalaan. Hindi ba’t tuwid na daan ang sinusulong ng kasalukuyang administrasyon? Hindi ito mararating kung magbubulag-bulagan tayo na hawak lamang ng iilan ang kapangyarihan. Hindi ito mararating kung mabibigo ang tatlong sangay ng pamahalaan na gawin ang kanilang magkakahiwa-hiwalay na tungkulin.
Ehekutibo, lehislatibo at hudikatura – tatlong iba’t ibang sangay ng pamahalaan. Ito ang istruktura ng gobyerno upang matiyak na ginagawa nila ang kanilang gampanin at pantay ang pagkakabahagi ng kapangyarihan. Sa kasalukuyang sitwasyon ng Pilipinas, taguri na lamang ang tatlong sangay na ito. Ngunit hindi pa huli ang lahat upang maibalik ng linyang naghihiwalay sa tatlong sangay ng pamahalaan. Maglakas-loob nawa ang mga nasa lingkod-bayan na manindigan para sa katotohanan.