Kabanata I
Ang Suliranin at Kaligirang Kasaysayan

Nakapokus ang unang kabanata ng pananaliksik sa kaligirang kasaysayan ng paksang pinili ng mga mananaliksik. Tinalatalakay ng kabanatang ito ang mga dahilan kung bakit pinili ng mga mananaliksik ang ninais na paksa at kung anu-ano ang magsisilbing kanilang gabay sa pag-aaral.

Panimula Ang pagsali sa mga fraternity ay isa sa mga pinag-uusapang kalakaran noon hanggang ngayon na palasak sa mga mag-aaral ng kahit anong kolehiyo at unibersidad. Binigyang kahulugan ang fraternity bilang isang samahan ng mga kalalakihan na naglalayon ng iisang adhikain, halimbawa ay pagtulong sa iba at pagtatanggol sa isa’t-isa sa mga oras ng kagipitan at pangangailangan. Sari-saring opinyon ang sinasabi ng mga tao hinggil sa isyung ito, ang iba ay positibo habang ang iba ay negatibo. Iba’t iba man ang dahilan kung bakit dapat o hindi dapat sumali sa isang fraternity, higit na dapat pagtuunan ng pansin may kinalaman sa usapin ay kung paano ito maaaring makaimpluwensya sa abilidad ng mag-aaral na makisalamuha sa iba at sa kakayahan niyang mag-isip at magpasya sa lohikal at epektibong paraan, kasali na rito ang “academic standing” sa pangkalahatan ng mga mag-aaral na miyembro ng fraternity. Kaya napagkasunduan ng mga mananaliksik na gumawa ng isang mapanuring pagtalakay na may temang “Ang Ginagampanan ng Fraternity sa Pagpapaunlad ng Sosyal at Intelektwal na Kakayahan ng mga Mag-aral ng TIP-QC.”

Kaligirang Kasaysayan Hindi na kaila ang padami na padaming bilang ng mga mag-aaral na namatay dahil sa pagsali sa fraternity. Dahil dito, sinabi ni Andrea de Dios (2012) na ang imahe ng organisasyong iyon na dati’y isang brotherhood lamang ay napalitan ng gulo, sakitan at patayan. Maaaring masangkot sa gulo ang mga miyembro at mapabayaan ang kanilang pagaaral. Karagdagan pa, tinatabunan ng mga insidente ng hazing, paglalasing, sekswal na pang-aabuso at di-aktibong partisipasyon sa klase ang pakinabang ng pagsali sa fraternity (Anita Jo Cory, 2011) at talagang tuluyan nang lumayo ang mga ganitong organisasyon sa kanilang orihinal na tradisyon at layunin (Garret at Maisel, 1990). Sa pananaw naman ni Alexander Astin (1993), ang mga fraternity ay maaaring magtaguyod ng isang mapagmalasakit at maaasahang komunidad kung saan malilinang ng mga estudyante ang kanilang interpersonal na abilidad at kakayahan bilang isang lider. Simula pa noong mga nakaraang dekada, ang mga namumuno sa mga fraternity ay nagsisikap na magpokus sa kalakip na layunin at misyon ng samahan: pagsuporta sa kanilang mga iskolar, pagbigay ng serbisyo, pagpapasulong ng pangangasiwa at iba pang kaugnay na gawain. May kinalaman sa pagsali sa mga ganitong organisasyon, karamihan sa mga literaturang naglalayon ng pagsulong ng mag-aaral ay nagtatampok ng mabubuting impluwensya sa tagumpay at kaunlaran ng kanilang mga miyembro (Cory, 2011). Kaya naman, hindi kumbinsido sina Kharla Mae Brillo, et al. (2012) na nagdudulot ng mga negatibong resulta sa mga estudyante ang pakikibahagi sa mga fraternity.

Balangkas Teoretikal Sa Social Cognitive Theory ni Albert Bandura (1986), sinasabing iniimpluwensyahan ng kapaligirang ginagalawan ng isang tao ang pag-unlad ng kanyang intelektwal na kakayahan. Nakasentro ito sa ideyang nakukuha ng tao ang kanyang mga katangian at pag-uugali sa pamamagitan ng pagmamasid at paggaya sa anumang napagmamasdan, mabuti man ito o masama. Subalit maaari itong maituwid sa pamamagitan ng wastong edukasyon galing sa paaralan.

Mga Tiyak na Katanungan Inaasahan ng mga mananaliksik na masagot ang mga sumusunod na katanugan: 1. Paano nakakaapekto ang fraternity sa relasyon ng kanilang mga miyembro sa ibang tao? 2. Anu-ano ang ginagampanan ng pagsali sa fraternity sa pagpapasulong ng intelektwal na kakayahan ng mag-aaral? 3. Paano nakakaimpluwensya ang fraternity sa kaunlaran ng kanilang mga miyembro? 4. Anu-ano ang pagkakaiba ng “academic standing” ng isang mag-aaral na miyembro ng fraternity sa isa na hindi miyembro? 5. Paano nagiging positibo ang impluwensya ng fraternity sa pagkatao ng kanilang mga miyembro?

Balangkas Konseptwal

Ang Ginagampanan ng Fraternity sa Pagpapaunlad ng Sosyal at Intelektwal na Kakayahan ng mga Mag-aral ng TIP-QC

Social Cognitive Theory

Mga Salik na Personal (Kognitib at bayolihikal na mga kaganapan)

Pag-uugali (Behaviour)

Mga Salik sa Kapaligiran (Kultura at kinabibilangang organisasyon)
Positibo
Negatibo

Resulta ng Pananaliksik

Pigura-Bilang 1

Magsisilbing gabay ng pananaliksik ang Social Cognitive Theory ni Albert Bandura. Nahahati sa dalawang salik ang pag-uugali ng isang tao – ang una ay personal habang ang pangalawa ay organisasyunal. Nakatuon ang pansin ng pag-aaral sa organisasyunal o kapaligirang salik bilang isa sa mga pangunahing dahilan sa proseso ng pagdebelop ng isang indibidwal. Ang organisasyong kinabibilangan ng isang isa ay maaaring magdulot sa kaniya ng positibo o negatibo impluwensya. Nakadepende sa resulta ng pananaliksik ang magiging patunay kung ano ang impluwensya ng fraternity bilang isang organisasyon sa pagsulong ng sosyal at intelektwal na kakayahan ng isang mag-aaral.
Haypotesis
Base sa mga reperensyang nakalap sa mga naunang talata, inaasahan ng mga mananaliksik na malilinang at mapapaunlad ng mga mag-aaral ang kanilang sosyal at interpersonal na kakayahang makisalamuha sa iba. Subalit may kinalaman sa usaping intelektuwal, maaaring hindi positibo ang pagganap ng fraternity sa kaunlaran ng mga mag-aaral. Dahil sa iba’t ibang aktibidad na isinusulong ng mga fraternity, maaaring mapabayaan ng mag-aaral ang kanyang responsibilidad sa paaralan anupat bumaba ang kanyang academic standing.

Saklaw at Limitasyon Ang pananaliksik na ito ay nakatuon sa impluwensiya ng fraternity sa sosyal at intelektuwal na kakayahan ng mga mag-aaral. Ang magiging mga respondente sa pag-aaral ay mula lamang sa mga mag-aaral na may kursong Engineering sa Technological Institute of the Philippines, Quezon City. Ang panahong saklaw ay magmula Enero 2015 hanggang Marso 2015. Umaasa ang mga mananaliksik na makapag-ambag ng impormasyon ang pag-aaral at makapaglaan ng kasagutan sa mga karaniwang tanong may kaugnayan sa paksa.

Kahalagahan ng Pag-aaral Makikinabang ang mga sumusunod na indibidwal sa pananaliksik:

Sa mga mag-aaral – Makatutulong ang pag-aaral para sa mga kabataan na napapaharap sa pagpili kung dapat ba o hindi dapat makibahagi sa isang fraternity. Sa pamamagitan ng pananaliksik, malalaman ng mga mag-aaral kung paano maaaring makaapekto sa kanilang pag-unlad ang pagsali sa fraternity at sa pagkaalam nito, hahantong sila sa matalinong pagdedesisyon.

Sa mga magulang at guro – Ang pagaaral ay magsisilbing gabay ng mga magulang at guro upang protektahan ang kanilang mga anak o mag-aaral sa mga posibleng panganib ng pagsali sa fraternity. Sa kabilang banda, maaari ring magsilbing pampatibay ang pananaliksik upang himukin ng mga magulang at guro ang kabataan na umanib sa fraternity sa pagkaalam ng mga programang tinatangkilik ng organisasyon.
Sa lipunan – Bagaman personal na desisyon ang pagsali sa fratrenity at walang inirerekomendang pagpapasya ang mga mananaliksik, mapagtitimbang-timbang ng isang responsableng mamamayan ang mga datos na mailalakip sa pag-aaral sa pagbuo ng isang kongkreto at balid na kongklusyon. Tutulong ang pananaliksik na ito upang mabuksan ang isip ng lipunan sa epekto ng fraternity sa kanilang mga miyembro, positibo man o negatibo.

Katuturan ng mga Salitang Ginamit Binigyang-kahulugan ang mga sumusunod na salita na madalas gamitin sa pag-aaral upang mas madaling maintindihan ng mambabasa kung paano iniangkop at iniugnay ang mga terminolohiya sa paksa ng pananaliksik:

Akademik – edukasyon at kaalaman na natututunan sa paaralan
Brotherhood – pagkakaibigan at pagdadamayan sa pagitan ng mga miyembro ng isang organisasyon
Engineering – programa sa kolehiyo na umuugnay sa pagdidisenyo at paggawa ng iba’t ibang bagay na ginagamitan ng siyentipikong paraan
Fraternity – isang grupo ng kalalakihan na organisadong kumikilos para sa iisang layunin at interes
Hazing – mga gawain kung saan pinipwersa ang isang indibidwal na gawin ang isang bagay na labag sa kanyang kalooban
Initiation - seremonyang idinadaos upang maging legal na miyembro ang nagnanais na sumali sa isang fraternity
Intelek – matalinong indibidwal na may abilidad na mag-isip sa lohikal na paraan
Inobasyon – mga bagong ideya at imbensyon para sa ikauunlad ng lipunan
Interpersonal – relasyon ng isang tao sa iba
Intrapersonal – pananaw at relasyon ng isang tao sa kanyang sarili
Kognitib – kakayahan ng tao na mag-isip
Lohikal na pag-iisip – kakayahang mag-isip ng makatwiran at tumpak na nagreresulta sa mga matagumpay na pagdedesisyon
Organisasyon – sistematikong grupo na may iisang pamantayan at batas
Pakikisalamuha – pakikisama at interaktib na pakikitungo sa iba
Sosyal na abilidad – kakayahan ng indibidwal na makisalamuha at makipaginterak upang makapagtaguyod ng relasyon sa kapwa-tao

Kabanata II
Mga Kaugnay na Pag-aaral at Literatura

Tinutukoy sa kabanatang ito ang mga pag-aaral at mga babasahin o literaturang kaugnay ng paksa ng pananaliksik. Magbibigay-impormasyon ito sa mambabasa kung ano ang nakaraan hanggang kasalukuyang estado ng kaalaman kaugnay sa pag-aaral.

Lokal na Pag-aaral Pinag-aralan ni R.A.D Castellano (2003) ang mga uri ng komunikasyon sa pagitan ng mga miyembro mula sa iba’t ibang fraternity na pinaniniwalaang pasimuno ng mga gulo at karahasan. Ang UP Diliman ay lugar kung saan namugad ang mga kilalang fraternity noon pa man. Sa nagdaang mga taon, hindi maikakailang marami ang nasasangkot sa mga away-fraternity sa loob o labas man ng campus. Natuklasan sa pag-aaral na nagsisimula ang ganitong mga gulo sa mga agresibong aksyon na maaaring humantong sa mararahas na away. Bukod dito, ang pagkakaiba-iba ng kultura ng bawat fraternity ay isa rin sa mga dahilan sa mga alitan ng ganitong mga organisasyon. Sa pananaliksik nina Gallevo, et. al. (1988), dapat na kilalaning mabuti ng isang indibidwal ang mga miyembro ng fraternity at huwag husgahan. Ang pangunahing layunin ng pananaliksik ay upang alamin at ipaliwanag ang paraan ng pamumuhay ng mga kasapi sa ganitong mga grupo. May layunin din itong buksan ang mata ng lipunan kung ano ang katotohanan sa likod ng mga fraternity. Natuklasan sa pag-aaral na ang fraternity ay tungkol sa impluwensya, mga programa, at ang epekto nito sa personal na buhay ng kanilang mga miyembro, pag-aaral, pamilya at pagkakaibigan. May layunin din itong magbigay tulong kung paano haharapin ang mga problema. Sa pananaw nina Jefferson Bagadiong, et.al. (2014), ang pagsali sa mga fraternity ay maaaring maging mabuti o masama. Nakadepende sa tao kung paano niya haharapin ang mga sitwasyon sa kanyang pagsali. Kalimitan nang bumababa ang mga marka ng mga mag-aaral na sumasali sa fraternity. Pero upang protektahan ang kanilang sarili sa mga inaakalang kapahamakan dulot ng pagiging baguhan, maraming mag-aaral ang nahihikayat na sumali sa mga fraternity. Ang iba ay upang sumikat, sa paniniwalang mapapataas nila ang kanilang reputasyon kapag kabilang sila sa isang kilalang fraternity sa paaralan. Sa mga kaugnay na pag-aaral na isinagawa sa bansa, pinaniniwalaang may papel na ginagampanan ang fraternity sa mga bayolenteng gulo na kadalasang nangyayari sa loob man o labas ng paaralan. Taliwas ito sa sinasabing layunin nila na pasulungin ang interpersonal na abilidad ng kabataan at pagkakaibigan sa pamamagitan ng iba’t ibang programa na kanilang itinataguyod. Subalit marami pa ring mag-aaral ang naeengganyong sumali sa mga fraternity sa paniniwalang kaya silang protektahan ng mga ito.

Banyagang Pag-aaral Ayon kay Dante Jordan (2011), may bentaha at disbentaha ang pagsali sa mga fraternity. Ang ilan sa mga bentaha ng pagsali sa ganitong mga organisasyon ay ang pagkakaibigan at mga koneksyon mula sa kapatiran. Ang pagkakaibigang nasumpungan sa fraternity ay kadalasang tumatagal habambuhay at may pakinabang sa mundo ng negosyo. Para sa mga baguhan, ang mga fraternity ay nagtatakda ng halaga sa mga gustong maging miyembro. Bilang halimbawa, humigit-kumulang $265 (P11,730.36) ang natatanggap ng Pi Kappa Phi Fraternity mula sa national initiation due bukod pa sa annual fee na may halagang $130 (P5,754.52). Kasali sa buhay-fraternity ang paglalasing at “partying”. Sa isang pag-aaral ng Harvard School of Public Health, natuklasang apat sa limang miyembro ng fraternity ang may kakayahang umubos ng maraming alkohol sa loob ng maikling oras. Pinapakita ng istatistika na maaaring uminom nang uminom ang isa sa mga okasyong idinadaos ng ganitong mga organisasyon hanggang sa puntong mawalan siya ng malay at hindi na muling magising pa. Andiyan din ang isyu ng hazing. Bagaman may mga batas nang kontra rito, hindi pa rin nawawala ang mga kaso ng hazing sa maraming unibersidad sa Amerika. Sa kanyang pananaliksik na pinamagatang “Cognitive Effects of Greek Affiliation During the First Year of College”, pinag-aralan ni Ernest Pascarella
(1994) ang kognitib na epekto ng mga fraternity at sorority sa 2,293 mag-aaral ng unang antas sa kolehiyo sa 15 na estado ng Amerika. May layunin siyang alamin kung gaano kataas ang makukuha ng mga mag-aaral pagdating sa mga kategoryang “reading comprehension, critical thinking” at matematika. Sinikap niya ring alamin kung magkakaiba ang impluwensya ng fraternity sa mga mag-aaral na may iba’t-ibang katangian mula sa magkakaibang kolehiyo. Natuklasan sa pananaliksik na mas mababa ang nakuhang marka ng mga kalalakihan at kababaihang kabilang sa fraternity at sorority kung ihahambing sa mga hindi miyembro. Ipinahihiwatig ng pag-aaral na ang panggigipit mula sa kasamahan at pagsali sa mga fraternity o sorority ay hindi kadalasang umaayon sa edukasyunal at intelektwal na misyon ng mga kolehiyo at unibersidad. Sinabi pa ni Pascarella (1994) na layunin ng mataas na edukasyon sa bansang Amerika ang paunlarin ang pag-iisip ng indibiduwal upang kumilos sya kaayon ng moral na pamantayan. Sa isang pag-aaral na isinagawa ni Gary Pike (2000), sinasabi na ang pakikibahagi sa mga fraternity ay hindi gaanong nakakatulong sa akademikong pag-aaral. Mas matindi ang epekto ng ganitong mga organisasyon sa mga mag-aaral sa mataas na antas kumpara sa mga mag-aaral sa mababang antas. Sa mga nakaraang taon, ang pagkilala sa mga fraternity sa mga kolehiyo at unibersidad ay dumadaan sa masuring inspeksyon. Ang mga resulta mula sa National Study of Student Learning (NSSL) ay nagpapakitang may negatibong epekto ang mga fraternity sa kognitib na pagsulong ng mga mag-aaral partikular na sa mababang antas ng kolehiyo. Gayunpaman, sa pananaliksik na isinagawa sa isang unibersidad sa Midwest, natuklasang mas mataas ang potensyal at abilidad ng mga mag-aaral na miyembro ng fraternity kung ihahambing sa mga hindi miyembro. Ang pakikibahagi sa mga sosyal na aktibidad na isinusulong ng organisasyon ang pinaniniwalaang dahilan ng kognitib na kaunlaran ng mag-aaral. Maaaring makabuti at makasama ang pagsali sa mga fraternity. Malawak ang koneksyon ng isang indibidwal sa kanyang pagsali sa fraternity, subalit maaari ring makompromiso ang kanyang buhay sa mga gawaing idinadaos ng kinabibilangang organisasyon. May kinalaman sa usaping akademiko, natuklasang kalimitan nang mas mababa ang “academic standing” ng isang mag-aaral na kabilang sa isang fraternity bagaman maaaring sa ibang lugar ay mas mataas naman ang kanilang nakukuhang grado sa paaralan.

Lokal na Literatura Sinabi ni Argee Guevarra (1989) na nakakaintriga at nakakatakot ang kultura ng mga fraternity sa kolehiyo. Habang pilit na inuunawa ang layunin ng mga fraternity, lalo lamang nitong pinapaigting ang mga dahilan upang mapoot dito. Bilang halimbawa, dahil sa away sa pagitan ng dalawang fraternity, isa ang nalagay sa kritikal na kondisyon dahil sa malulubhang tama ng tubo at dos-por-dos. Ang mga pangyayaring tulad nito ay hindi nagtataguyod ng kahalagahan ng pagkuha ng akademikong pag-aaral, bagkus dumadagdag lamang ito sa kinakaharap na mga suliraning panlipunan ng bansa. Isa lamang yan sa mga dahilan kung bakit mahirap maunawaan ang paraan ng kanilang pamumuhay. Sinasabing ang mga ganitong gulo ay parte na ng buhay-frat. Subalit ang pakiramdam ng pagiging bahagi ng ganitong buhay ay nagdudulot lamang ng pag-aalinlangan at takot sa mga miyembro. Ayon naman kay Rafael Jude Tomeldan (1980), ang mga marahas na gulo ay hindi dapat laging isisi sa mga fraternity. Ang mga fraternity ay maaaring ihalintulad sa mga bansa. Ang mga miyembro ay mas makakaramdam ng kapanatagan sa kinabibilangang fraternity kung handa nilang ipagtanggol ang isa’t isa sa oras ng kagipitan. Sa pananaw ng iba, ang pagsali sa mga fraternity ay makabuluhang karanasan dahil natututo silang makisalamuha sa ibang tao. Ang mga miyembro na nahihirapan sa mga aralin sa paaralan ay maaaring magpatulong sa iba pang miyembro na mahusay sa klase. Ang pagsali sa mga fraternity ay maaaring kasiguraduhan din pagdating sa paghahanap ng trabaho sa kinabukasan dahil sa mga koneksyon ng kapwa fratmen. Sinabi pa ni Candy Palenzuela (2007) na kinikilala ng mga mag-aaral ang fraternity at sorority bilang mga pantulong na grupo dahil sa alok nitong “academic assistance” sa kanilang mga miyembro. Ang iba ay nagbibigay pa nga ng pinansyal na tulong. Ang pagsali sa mga fraternity o sorority ay nag-aalok ng maraming oportunidad pagkatapos ng pag-aaral sa kolehiyo. Ang mga nangangasiwa sa malalaking kompanya ay kadalasang pumipili ng mga manggagawa mula sa kapareho nilang fraternity o sorority. Kung gayon, ang pagsali sa mga fraternity o sorority ay isang paraan upang makakuha ng trabaho pagkatapos ng pag-aaral sa kolehiyo. Hindi maikakailang bahagi ng buhay-frat ang karahasan at mga away. Subalit ayon sa reperensya, lalo lamang nitong pinagbubuklod ang kanilang mga miyembro upang makadama ng kapanatagan at seguridad na handa nilang ipagtanggol ang isa’t isa sa anumang oras. Bukod dito, handa silang magtulungan sa mga usaping akademiko maging hanggang sa paghahanap ng trabaho ng kanilang mga kasapi.
Banyagang Literatura Sa akdang “Catholic Views and Teachings on College Fraternities” ni Destiny Keller (2011), binigyang-diin ng manunulat na ang pagsali sa fraternity ay kapaki-pakinabang sa mga mag-aaral ng kolehiyo, katoliko man sila o hindi, kung pipiliin nilang mabuti ang sasalihang organisasyon. Malilinang ng isa ang kanyang abilidad na maging lider sa pamamagitan ng pagsali sa mga proyektong isinusulong ng mga fraternity. Marami sa mga fraternity ang nagbibigay ng “scholarship”. May positibong papel din ang ginagampanan ng ganitong mga grupo sa pagtataguyod ng pagkakaibigan at pagpili ng libangan. Kadalasan nang may hindi magandang imahe ang mga fraternity dahil sa mga balita ng sobrang pagsasaya, malupit na hazing at sekswal na imoralidad. Subalit hindi lahat ng organisasyon ay pare-pareho. Nakapokus ang ibang samahan sa paglilingkod sa bayan at umiiwas sa mga masamang gawaing kadalasang nauugnay sa karamihan ng mga fraternity. Ang importante ay ang pag-iwas sa mga panghihikayat na inaalok ng karamihan sa mga fraternity. Subalit hindi maikakaila na maaaring humantong sa hazing ang initiation rite na isinasagawa ng karamihan sa mga kilalang fraternity. Ayon kay Katie Lambert (2009), ang tusong pakana ng pagpapahirap upang maging miyembro ay nagdudulot lamang ng kahihiyan sa indibiduwal na makakaranas. Ang iba ay nakakaramdam ng pagnanais na mapag-isa dahil sa pakiramdam ng pagiging iba. Ang ganitong pang-aabuso ay hindi nagdudulot ng positibong epekto sa sosyal at intelektwal na abilidad ng mag-aaral bagkus ay magdudulot ito ng pisikal at emosyonal na pagkabahala. Bukod sa labis na pagpapahirap, maaaring pilitin din ang isa na gumawa ng mga sekswal na bagay na labag sa kanyang loob, maaaring hindi siya patulugin o lunurin pa nga sa tubig. Ang mga kinikilalang fraternity ay hindi na nagsasagawa ng ganitong mga ritwal subalit isinusulong pa rin ito ng iba na may layuning mapatunayan ang katapatan ng mga bagong miyembro. Ang mga nasabing gawain ay nakamamatay. May kinalaman sa pagbabawal sa pagsali sa mga fraternity sa Princeton School, ipinaliwanag ng punong-guro na si Shirley Tilghman (2011) na negatibo ang epekto ng mga fraternity sa kampus. Pinaniniwalaang iniimpluwensyahan nito ang kabataan na ihiwalay ang kanilang sarili sa ibang tao at pagkakabaha-bahagi sa sosyoekonomikal na estado. Sa ibang pagkakataon, ineempasis ng ganitong mga organisasyon ang labis na pag-inom ng alkohol, at na ang pangunahin nilang biktima na mga miyembro ay yaong mga mag-aaral sa unang antas ng kolehiyo dahil wala pa silang gaanong karanasan. Sa pagpili ng sasalihang organisasyon, mahalagang kilatasing mabuti ng isang indibidwal ang pipiliing fraternity. Hindi lahat ng fraternity ay pare-pareho. Maaaring ang iba ay nagtataguyod ng marahas na buhay habang ang iba ay nakapokus sa pagtulong sa lipunan. Subalit karamihan ng mga reperensya ay nagsasabing negatibo ang epekto ng fraternity lalung-lalo na sa mga mag-aaral sa unang antas ng kolehiyo anupat nagdudulot lamang ito ng pagkakabaha-bahagi, hindi ng pagkakaisa.

Kabanata III
Ang Disenyo at Paraan ng Pananaliksik

Tinatalakay sa kabanatang ito ang disenyo at mga paraan kung paano mangangalap ang mga mananaliksik ng mga datos sa pag-aaral. Itutunghay sa ikatlong kabanata ang mga baryabol na magmamanipula sa pag-aaral upang tumungo sa isang balid at maaasahang konklusyon.

Disenyo ng Pananaliksik Napagkasunduan ng mga mananaliksik na gamitin ang disenyong deskribtib-analitik bilang pamamaraan ng pangangalap ng mga datos at impormasyon hinggil sa mga salik may kaugnayan sa paksa ng pananaliksik. Ang disenyong deskriptib-analitik ang pinakasimpleng pamamaraan ng pananaliksik (Rolando Bernales, et. al., 2008). Ang deskriptib na pamamaraan ay naglalayong mangalap ng impormasyon tungkol sa umiiral na mga kondisyon sa kasalukuyan (Sevilla et. al., 1992). May tungkulin itong ipaliwanag ang mga kaugnay na kalagayan sa pag-aaral sa pamamagitan ng mga kwaliteytib na paglalarawan. Ang analitik na pamamaraan ay ginagamitan ng istatistikal na mga tritment at kwantiteytib na mga pormula upang sa gayon ay maging balid ang gagawing pag-aaral. Ang mga mananaliksik ay gagamit ng mga naratibong paglalarawan at mga istatistikal na komputasyon sa disenyong deskriptib-analitik.

Pamamaraang Gagamitin sa Pananaliksik Tinitiyak ng mga mananaliksik na ang pag-aaral ay nakaayon sa balangkas-konseptwal upang magkaroon ng balid at konkretong kasagutan ang mga tiyak na katanungang nakaulat sa Kabanata I ng mungkahing pananaliksik. Ang magiging konklusyon sa pag-aaral ay magmumula pangunahin na sa magiging tugon ng mga respondente. Marapat na tiyakin ng mga mananaliksik na hindi maninipulahin ang mga datos na makukuha mula sa mga baryabol ng pananaliksik. Ang mga tugon ng mga respondente ay manggagaling sa kanilang personal na karanasan. Bukod sa mga reperensyang maaaring pagmulan ng konklusyon, maghahanda ang mga mananaliksik ng mga tanong na huhusgahan ng mga kalahok sa pag-aaral gamit ang Likert Scale – 5 ang pinakamataas habang 1 ang pinakamababa. Pagkatapos makuha ang mga datos sa sarbey-kwestyoner, gagamitan ito ng istatistikal na tritment sa pagbuo ng balid na resulta.

Teknik sa Pagkuha ng Kalahok sa Pag-aaral Ang mga respondente sa pag-aaral ay pipiliin sa pamamagitan ng Stratified Random Sampling. Sa sistemang ito, malayang pumili ang mga mananaliksik ng isang tiyak na bilang ng mga sampol – babae man o lalaki – mula sa bawat grupo (stratum) ng mga kinikilalang fraternity sa TIP-QC. Kukuha ang mga mananaliksik ng tig-sasampung mag-aaral mula sa siyam na fraternity ng TIP-QC na siyang magiging independent na baryabol sa pag-aaral. Ito ay may kabuuang bilang na 90 respondente. Ang mga kalahok ay dapat na mag-aaral ng TIP-QC at kumukuha ng programang Engineering anuman ang kanilang edad, kasarian at lebel sa kolehiyo.

Instrumentong Gagamitin sa Pananaliksik Sa pagkuha ng mga datos mula sa mga respondente, gagamit ang mga mananaliksik ng sarbey-kwestyoner. Ayon kay Bernales, et. al., (2008), ang pagpapasagot ng sarbey-kwestyoner sa mga respondente ang pinakakaraniwan at pinakamadaling paraang aplikable sa isang deskriptib-analitik na disenyo. Ang instrumentong ito ng pangangalap ng datos ang pinakapraktikal na gamitin sa pananaliksik na isasagawa sa limitadong panahon at abalang mga respondente.

Paraan ng Pangangalap ng Datos Sa tulong ng mga aklatan at ng Internet, nakapangalap ang mga mananaliksik ng sapat na mga datos at impormasyon sa pag-aaral. Nag-ambag din ang nakalimbag na mga artikulo mula sa mga pahayagan sa pagpapahayag ng opinyon at obserbasyon ng nakararami may kaugnayan sa paksa ng pananaliksik. Minaksimays ng mga mananaliksik ang paggamit ng mga reperensya at ng kaligirang pag-aaral upang magkaroon ng gabay sa magiging posibleng resulta ng pag-aaral. Ginamit ng mga mananaliksik ang istilong APA bilang pagkilala sa mga awtor ng mga nakasayt na reperensya. Pinagtitibay nito ang kredibilidad ng mga datos at impormasyon na ginamit sa pananaliksik.

Komputasyon Istatistikal Sa isang pamanahong-papel, hindi kailangang gumamit ng mga kompleks na istatistikal tritment (Bernales, et. al., 2008). Dahil dito, gagamit ang mga mananaliksik ng paraang pagkuha ng porsyento o bahagdan matapos mai-tally ang mga kasagutan sa kwestyoner ng mga respondente. Tinatawag ang pormulang ito na Mean Deviation. May pormula itong:

x = ( fN ) (100) f = dalas ng pagkakasagot sa bawat katanungan N = populasyon ng mge respondente 100 = magtutumbas sa desimal upang maging porsyento

Talaan ng Sanggunian

Aklat at mga Tisis

Brillo, et. al., (2012). Leadership Identity Development: The Influence of Fraternity or Sorority Membership on College Studens Leaders. Course Req. Thesis, University of the Philippines Visayas. Philippines
Cory, A.J. (2011). The Influence of Fraternity and Sorority Membership on the Leadership Identity Developmet of College Student Leader. PhD Thesis, Washington State University. Washington, USA.
Garrett, D. (1990). The Value of the Greek system: Should fraternities and sorority have a place on campus?. PhD Thesis, University of Newcastle, UK.

Artikulo at Dyornal

Astin, A.W. (1999). Student Involvement: A developmental theory for higher education. Journal of College Student Development, 40(5), 587-599
De Dios, A. (2012). Mabubuti at masamang epekto ng pagsali sa Fraternity, Youth Force, p.1