Essay: “Who made me”
Në qoftë se do më duhej të përshkruaja veten me pak fjalë, do të thoja “e vetëpërmbajtur” ose si karakteristikë “vetëkontrolli” dhe “e drejtpërdrejtë”. Pak raste mund të më vijnë në mendje që e kam lëshuar veten para personave të tjerë (ndoshta me familjarët më të afërt vlen më pak) e ndonjëherë dhe nuk ia lejoja vetes dobësi në momente të saktuara. Çfarë ka ndikuar në kërë pjesë të karakterit tim me saktësi sigurisht që nuk mund ta përcaktoj, por me siguri janë si gjenet ashtu edhe ambjenti ku jam rritur.
Nuk e kam të vështirë ta identifikoj veten me mamanë time e cila gjithnjë ka qenë pika e referimit në familjen time për qëndrueshmërinë dhe fortësinë që tregonte gjithnjë. Kam dashur ta kem karakterin e saj dhe përveçse i ngjaj në paraqitje besoj se e kam marrë dhe këtë cilësi të saj. Nga ana tjetër, jam rritur në një familje ku të tërë janë kujdesur të mos më mungojë asgjë dhe duke qenë më e vogla me një diferencë moshe 7 vjet me motrën dhe 13 vjet me vëllain, këshillat që merrja prej tyre vinin nga eksperienca dhe jo teorike. Besoj se arsyeja pse kam qenë e mbyllur, duke u munduar që ato pak shqetësime që mund të kisha ti kaloja vetë, vinte nga fakti që e ndjeja diferencën e moshës me ta aq më tepër kur të dy ishin me studime apo më vonë në punë në qytet tjetër dhe të vetmit me të cilët supozohej që mund të bisedoja ishin prindërit. Ajo që këta të fundit janë përpjekur gjithnjë të më mbështesin ka qenë studimi duke më theksuar që ishte e vetmja mënyrë për të ecur përpara, aty ku ata për shkak të kohës kur ishin rritur skishin mundur. Kështu kultivova dijet dhe duke qenë se vëllai dhe motra para meje kishin ndjekur të njejtën rrugë, unë e pata më të lehtë.
Shoqëria ka qenë një tjetër faktor ndikues të cilën se kam lënë asnjëherë pas dore megjithëse ka ndryshuar shpesh. Ato që un kërkoja apo synoja nuk kanë ndryshuar shumë gjatë kohës, studimi dhe rritja e vazhdueshme e dijeve, ndërkohë që ato të shoqeve të mija mund të lëkundeshin herë pas here çka bënte që vetvetiu të vinin shkëputjet. Gjithsesi merrja gjithnjë diçka pozitive nga secila. Të qënit e drejpërdrejtë jo gjithmonë më ndihmonte pasi jo të gjithëve iu pëlqen të dëgjojnë kritika, por nuk e kam ndryshuar këtë pjesë të karakterit pasi i them gjërat hapur ashtu siç dua të më thuhen. Megjithëse jam duke përmirësuar mënyrën e të shprehurit duke u munduar të rris dozën e maturisë. Dy kanë qenë ndikimet më të mëdha prej tyre pothuajse në të njejtën periudhë, gjimnazi. I pari ka qenë një shok i 8-vjeçares që e ritakova në një kurs matematike në vitin e dytë të gjimnazit, nga i cili njoha më mirë rrymën Rock dhe grupin muzikor Metallica që e kam shumw tw preferuar edhe sot. Paçka se fillova të dëgjoja Rock, pjesën tjetër të shoqërisë nuk e ndryshova dhe këtë pasion e vazhdova ta shijoja unë vetëm pa ndikimin e mëtejshëm të personave të tjerë. E dyta ka qenë shoqja e ngushtë e asaj kohe e cila nëpërmjet të vëllait filloi të interesohej për fenë, dhe duke qenë të pandara dhe unë bashkë me të. Pavarësisht interesit që ngjalli feja islame tek unë, nuk arrija të pranoja shumë kushtëzime të saj që më dukeshin më shumë të induktuara nga njerëzit. Po të shtoj faktin se ndalohej dëgjimi i muzikës unë zgjodha ti besoj arsyes time në kushtëzimet që i vija vetes dhe jo atyre që më thuheshin nga të tjerët. Sado e parëndësishme që më ngjan tani si vështirësi, atëhere më dukej një zgjedhje e vështirë për tu bërë pasi të dyja ishin të rëndësishme për mua në atë kohë.
Shkëputja nga familja dhe universiteti bënë që të njihesha me njerëz të rinj që vinin nga rrethe të ndryshme. Paçka se shoqëritë shumë të zgjeruara skanë qenë ndonjëherë të preferuarat e mia, në këtë rast isha pjesë e një grupi të madh, gazmor dhe të larmishëm. Kjo bëri që të dilja disi nga ato barrierat e mia dhe ti jepja më shumë rëndësi shoqërizimit duke tentuar të mësoja sa më shumë nga të gjithë. Në vitin e tretë të fakultetit kërkova dhe një pavarësi financiare duke filluar një punë part-time ne call-center, gjë që më ndihmoi edhe më shumë në komunikimin më me lirshmëri me të tjerët sidomos me të panjohur.
Të gjithë këta individë dhe rrjedhshmëri ngjarjesh në vite kanë bërë të jem sot me karakterin e fortë, autokontroll, e hapur, e komunikueshme, me ambicje e dëshirë për të treguar atë që mendoj se vlej, dhe në punim e sipër me vetëbesimin.

Gledis Terziu