EL PRESIDENTE; THE GENERAL EMILIO AGUINALDO STORY AND THE FIRST PHILIPPINE REPUBLIC: A DISTORTED HISTORY
Posted by Xian Kahlil Anzures at 13 March, at 18 : 12 PM Print
Batay sa libro na sinulat ni Heneral Emilio Aguinaldo. Ang kasaysayan ng pelikula ay uminog sa kanyang buhay at sa ilang bahagi ng rebolusyong Pilipino simula sa kolonyalistang Espanya hanggang sa Imperyalistang Estados Unidos at ng Imperyong Hapon.
Ang pelikula ay tila mula sa interpretasyon nila Direktor Mark Meily at Aktor Producer Jeorge “E.R.” Estregan at hindi dapat iaakma ng manonood sa aktuwal na pangyayari na naganap sa kasaysayan ng Pilipinas, subalit kailangan ng patnubay ng mga matatanda ang mga batang manonood, para na rin maipaliwanag ng wasto ang ating kasaysayan sa mga ito.
Sa esensya na para maging makatotohanan ang pelikula, Espanyol ang lenguwahe na ginamit ng mga karakter. Kapansin-pansin din ang paggamit ng makailang ulit na “slow motion” para mabigyan ng pansin ang mga eksena sa pelikula, subalit tila dito na umiinog ang moda ng aksyon ng mga labanan sa giyera sa kabuuan ng pelikula .
Kalakhan ng mga pangalan at pangyayari na nabanggit at ginampanan ng ilang tauhan sa pelikula ay nasa libro ng kasaysayan. Bagaman may mga bahagi ng palabas o eksena na tila nabago o hindi nabigyan ng katarungan sa ating kasaysayan.
Malaking bahagi ng pelikula ang karakter ni Andres Bonifacio na binigyang buhay sa katauhan ni Cesar Montano. Di mapapalagpas ang eksena kung saan naganap ang paghalal sa mga maglilingkod sa bansang Pilipinas na ginanap sa Tejeros, Cavite. Hindi naman naging usapin para maging kalituhan ang parte ng Magdiwang at Magdalo at nalinaw sa pelikula na hindi sila isang partido na politikal.
Batay sa pag-aaral ng mga dalubhasa sa kasaysayan, sinasabi nilang medyo maiinitin ang ulo ni Bonifacio. Subalit tila hindi nabigyan ng katarungan ang ilang eksena sa pelikula, sa pangyayari sa buhay ni Andres Bonifacio na nagtatag ng Katipunan at ang naging Supremo nito ;
Lumabas na tulisan ang grupo ni Andres Bonifacio ng lumapit sila sa kanilang alyado o baseng masa, sa eksenang papatayin at susunugin ang bahay ng kanilang nilapitan nang walang maibigay sa kanilang suporta para sa rebolusyon.
Ang parte kung saan pinaatras ni Artemio Recarte ang kanyang mga pinamumunuan sa utos daw ni Bonifacio habang nakikipaglaban sila Emilio Aguinaldo sa Cavite ay nagmistulang taksil si Bonifacio sa Katipunan at sa Inang Bayan sa pangayayaring ito.
Ang pagdakip at pagpatay kay Andres Bonifacio at sa kanyang kapatid na Procopio ay hindi nailatag sa esensyang akma sa kasaysayan. Ang lugar na nabanggit ay tila nagging isang kalituhan kung saan sila hinatulan ng kamatayan na dapat sana ay sa Bundok Buntis sa Maragondon Cavite.
Ipinakita sa pelikula, ng makita nila Bonifacio ang mga taong dadakip sa kanila, pinaputukan nila ito ng baril. At ng lilitisin na sila, naunang binaril si Procopio at dito ay inagaw ni Andres ang itak ng isa sa humuli sa kanila at tila isang karakter na samurai na sumugod at pinagpapatay ang mga dadakip sa kanila.
Batay sa mga nag-aral at nagsaliksik ng kasaysayan, bago dakipin si Andres Bonifacio ay inimbitahan niya inalok ng sigarilyo at kape at tinanggap na mabuti bilang mga kaibigan ang mga Katipunero sa pamumuno ni Kolonel Agapito Bonzon mas kilala bilang Kolonel Yntong, bago sila binalikan kinaumagahan para dakipin.
Maging ang binabanggit ng kasaysayan na si Andres Bonifacio ay hindi nagpaputok ang kanyang baril o nabawasan ng bala ayon sa ilang mga mananasaliksik ng kasaysayan, gaya ng ilang pinakita na sila ang unang nagpaputok ng kanilang mga baril sa sa katipunerong humuli sa kanila.
Kapansin-pansin makailang beses binanggit o binigyang diin sa pelikula na hindi personal na iniutos ni Heneral Emilio Aguinaldo ang paghahatol ng kamatayan kay Andres Bonifacio.
Kung batay sa pagkakasulat ni Aguinaldo ang naturang pelikula sana naman ay binigyang linaw kung bakit nasabi niya na nagtaksil sa Katipunan at sa Inang Bayan si Andres Bonifacio.