Katawhan: “Patya siya! Si Barabas maoy buhii!”
Tigsaysay: (Si Barabas gibilanggo gumikan sa usa ka kagubot nga nahitabo sa siyudad, ug tungod kay siya nakabuno man.) Buot si Pilato nga buhian si Jesus, busa misulti siya pag-usab ngadto sa mga tawo. Apan misinggit sila patubag kaniya,
Katawhan: “Ilansang siya sa krus, ilansang siya sa krus!”
Tigsaysay: Sa ikatulo ka higayon miingon si Pilato kanila,
Pilato: “Apan unsa bay sala nga nahimo niya? Wala akoy nakaplagan bisag unsa nga angayng silotan sa kamatayon. Ipalatos ko siya ug unya buhian.”
Tigsaysay: Apan mipadayon sila pagsinggit og kusog kaayo nga si Jesus kinahanglan gayod nga ilansang sa krus; ug milampos gayod sila sa katapusan. Busa gipahamtang ni Pilato kand Jesus ang silot nga ilang gipangayo. Ug gibuhian niya ang tawo nga ilang gipili, ang gibilanggo tungod sa pagpanggubot ug sa papatayg tawo, ug gitugyan niya si Jesus ngadto kanila aron buhaton nila kaniya ang ilang gusto. Samtang gidala nila si Jesus, gikasugat nila ang us ka tawo nga ginganlag Simon nga taga-Cirene, nga nagpadulong sa siyudad gikan sa banika. Gidakop nila siya ug gipapas-an sa krus ug gipasunod kang Jesus. May dakong panon sa mga tawo nga misunod kang Jesus, ug pipila kanila mga babaye nga naghilak ug nagminatay tungod kaniya. Ug milingi si Jesus kanila ug miingon, Jesus: “Mga babaye sa Jerusalem! Ayaw ako ninyog hilaki, kondili hilaki ang inyong kaugalingon ug ang inyong mga anak. Kay moabot ang mga adlaw nga moingon ang mga tawo, ‘Bulahan ang mga babaye nga dili manganak u gang mga babaye nga wala makapanamkon, ug wala gatod makapasuso og mga bata!’ Mao kadtong panahona nga ang mga tawo moingon sa mga bukid, ‘Pangatumpag kamo kanamo!’ ug ngadto sa mga bungtod, ‘Taboni kami!’ Kay kon kining mga butanga gibuhat pa sa lunhaw pa ang mga kahoy, unsa kahay mahitabo kon kini laya na?”
Tigsaysay: Nagdala usab sila og laing duha ka tawo nga pulos criminal, aron patyon uban kang Jesus. Sa pag-abot nila sa dapit nga ginganlag “Ang Kalabera,” gilansang nila si Jesus ug ang duha ka criminal—ang usa diha sa iyang tuo ug ang usa diha sa iyang wala. Unya miingon si Jesus,
Jesus: “Amahan, pasayloa sila kay wala sila mahibalo sa ilang gibuhat.”
Tigsaysay: Ug gibahinbahin nila ang iyang saput pinaagi sa ripa. Nagtindog didto ang mga tawo nga nagtan-aw, samtang nagbugalbugal kaniya ang mga kadagkoan sa mga Judio, nga nag-ingon,
Katawhan: “Giluwas niya ang uban, paluwasa siya sa iyang kaugalingon, kon siya ang Mesiyas nga gipili sa Diyos!”
Tigsaysay: Gibugalbugalan usab siya sa mga sundalo; miduol sila ug gitunolan siyag bino, ug miingon,
Katawhan: “Kon ikaw ang hari sa mga Judio luwasa ang imong kaugalingon!”
Tigsaysay: Sa ibabaw sa krus gisulat nila kining mosunod: “Kini siya mao ang hari sa mga Judio.” Unya, usa sa mga criminal nga nagbitay didto mibugalbugal kaniya,
Katawhan: “Dili ba ikaw mao ang Mesiyas? Luwasa ang imong kaugalingon ug kami”
Tigsaysay: Apan gibadlong siya sa iyang kauban nga nag-ingon,
Katawhan: “wala kaba mahadlok sa Diyos? Kita ania dinhi gisilotan sa mao rang silot. Apan ang silot kanatong duha angay kanato, kay gisilotan man kita sibo s atong nabuhat, apan siya walay sala.”
Tigsaysay: Ug miingon siya kang Jesus,
Katawhan: “Jesus, hinomdumi intawon ako kon maghari kana!”
Tigsaysay: Miingon si Jesus kaniya,
Jesus: “Sultihan ko ikaw, karong adlawa adto ka sa Paraiso uban kanako.”
Tigsaysay: Mga alas dose ang takna sa dihang mihunong pagdan-ag ang adlaw ug mitabon ang kangitgnit sa tibuok kayutaan hangtod sa alas tres; ug napikas ang tabil didto sa templo. Unya misinggit si Jesus pagkusog,
Jesus: “Amahan, itugyan ko sa imong mga kamut ang akong espiritu!”
Tigsaysay: Human siya makasulti niini, namatay siya. Palihug mangluhod.
(Mangluhod ang tanan sa kadiyot) Palihug manindog. Ang opisyal sa mga sundalo nakakita sa nahitabo, ug gidayeg niya ang Diyos sa pag-ingon,
Katawhan: “Tinuod gayod nga siya maayong tawo!”
Tigsaysay: Sa dihang nakakita sa nahitabo ang mga tawo nga nagtapok didto aron pagtan-aw, namauli silang tanan nga namukpok sa ilang mga dughan. Ang tanan kaila ni Jesus, lakip ang mga babaye nga misunod kaniya sukad sa Galilea, nagpaantaw didto aron pagtan-aw niining mga butanga.