១.២.២. និយមន័យលិខិតឥណទាន លិខិតឥណទាន គឺជាការស្នើរសុំដោយអ្នកនាំចូល ឬអ្នកទិញទៅកាន់ធនាគារក្នុងប្រទេសរបស់ខ្លួនអោយចេញនូវលិខិតមួយសំរាប់បញ្ជាក់ចំពោះការទូទាត់ទៅអោយអ្នកទទូលផល ឬអ្នកលក់។ នៅពេលមួយកំណត់ជាក់លាក់ ព្រមជាមួយនិងឯកសារតម្រូវនៅក្នុងលក្ខខណ្ឌនៃលិខិតឥណទានមានភាពត្រឹមត្រូវក្រោមការត្រួតពិនិត្យរបស់ធនាគារអ្នកនាំចូល។ ការដែលធ្វើអោយមានការប្រើប្រាស់នេះ ធ្វើអោយមានទំនុកចិត្តគ្នារវាងអ្នកនាំចូល និងអ្នកនាំចេញកាន់តែខ្លាំងសំរាប់ដំណើរការនៃពាណិជ្ជកម្មអន្តរជាតិ។
១.២.៣. មុខងាររបស់លិខិតឥណទាន លិខិតឥណទានមានមុខងារមួយចំនួនគឺ៖
- ការទូទាត់ភ្លាមៗ (Prompt Payment) : អ្នកលក់នឹងទទួលបានការទូទាត់ភ្លាមបន្ទាប់ពីបានដឹកជញ្ជូនទំនិញ។ ប្រសិនបើគ្មានលិខិតឥណទានទេ អ្នកទទួលផលត្រូវការការទូទាត់មុនការដឹកជញ្ជូនទំនិញ ឬត្រូវរង់ចាំរហូតដល់អ្នកទិញទទួលបានទំនិញទើបទទួលបានការទូទាត់។
- ជំនួយជាហិរញ្ញប្បទាន (Substituting Credit) : អ្នកលក់អាចនឹងមានភាពស្ទាក់ស្ទើរក្នុងការលក់ទំនិញជំពាក់ (Open Account) ប្រសិនបើអ្នកលក់មិនបានដឹងច្បាស់ពីស្ថានហិរញ្ញវត្ថុ។ លិខិតឥណទានអាចជួយអោយអ្នកលក់មានទំនុកចិត្តក្នុងការលក់ទំនិញអោយទៅអ្នកទិញ។
- ការផ្ទេរចំណាយខាងផ្លូវតុលាការ (Shifting Litigation Costs) : រាល់កិច្ចសន្យាទិញលក់មានការប្រឈមមុខនិងហានិភ័យលើមុខទំនិញដែលមិនអាចអនុលោមតាមកិច្ចសន្យា។ ប្រសិនបើគេប្រើប្រាស់វិធីសាស្រ្តទូទាត់បែបជំពាក់(Open Account) អ្នកលក់ភាគច្រើននឹងចំណាយលើការប្តឹងផ្តល់ដោយសារមិនទទួលបានការទូទាត់ថ្លៃទំនិញ។ ចំពោះលិខិតឥណទានវិញ ចំណាយលើការប្តឹងផ្តល់ជាបន្ទុករបស់អ្នកទិញដោយសារអ្នកលក់ទទួលបានការទូទាត់ភ្លាម នៅពេលគាត់បង្ហាញរាល់ឯកសារបានត្រឹមត្រូវតាមលក្ខខណ្ឌរបស់លិខិតឥណទានទៅកាន់ ធនាគារអ្នកទិញ (Issuing Bank)។
- ការចរចាជាមួយអ្នកលក់ (Shifting the Forum) : អ្នកទទួលបានថ្លៃទំនិញអាចនឹងមានប្រៀបខាងផ្លូវច្បាប់។ ចាប់តាំងពីគេបានប្រើប្រាស់លិខិតឥណទានមក ថ្លៃទំនិញត្រូវប្រគល់អោយទៅអ្នកលក់ រីឯអ្នកទិញអាចទាមទារថ្លៃទំនិញវិញតាមរយៈការចរចាជាមួយអ្នកលក់។
១.២.៤. ភាគីពាក់ព័ន្ធក្នុងប្រតិបត្តិការលិខិតឥណទាន
• Applicant / Accountant Party (អ្នកស្នើសុំ, អ្នកទិញ ឬអ្នកនាំចូល) គឺជាអ្នកដែលបានស្នើសុំអោយធនាគាររបស់គាត់ចេញជាលិខិតឥណទាន សំរាប់ធានាលើការទូទាត់លើការនាំទំនិញចូលរបស់គាត់ទៅអោយ អ្នកលក់,អ្នកទទួលផល ឬអ្នកនាំចេញ។
• Beneficiary (អ្នកទទួលផល, អ្នកលក់ ឬអ្នកនាំចេញ) ជាអ្នកនាំចេញដែលលក់ទំនិញអោយទៅអ្នកទិញ។ គាត់ជាអ្នកដែលទទួលបានការទូទាត់នូវពេលដែលគាត់បានប្រគល់នូវរាល់ឯកសារដែលគោរព និងបានបំពេញនូវរាល់លក្ខខណ្ឌនៃលិខិតឥណទាន។
• Issuing Bank / Opening Bank (ធនាគារចេញផ្សាយលិខិតឥណទាន) ជាធនាគារដែលចេញលិខិតឥណទានទៅអោយអ្នកស្នើសុំក្នុងការទូទាត់ទៅអោយអ្នកលក់ នៅពេលដែលរាល់ឯកសារដែលបានបញ្ជូនមកដល់គោរពទៅតាមលក្ខខណ្ឌនៃលិខិតឥណទាន។
• Confirming Bank (ធនាគារបញ្ជាក់ ឬធនាគារទូទាត់ទៅអោយអ្នកលក់ផ្ទាល់) គឺជាធនាគារដែលបញ្ជាក់លើលិខិតឥណទានថា នឹងធានាលើរាល់ឯកសារពិតជាត្រឹមត្រូវដែលអាចទទួលបាននូវការទូទាត់ទៅអោយអ្នកលក់។ វាកើតឡើងនូវពេលមានសំណើរបស់អ្នកលក់ ឬអ្នកទិញនៅពេលចេញលិខិតឥណទានអោយរកធនាគារធ្វើការបញ្ជាក់លើលិខិតឥណទាន។
• Advising Bank (ធនាគារទទួលលិខិតឥណទាន ឬធនាគារជូនដំណឹង) ជាធនាគាររបស់អ្នកទទួលផលដែលមានភារៈកិច្ចក្នុងការជូនដំណឹងពីលិខិតឥណទានដល់អ្នកទទួលផល។
• Negotiation Bank / Paying Bank (ធនាគារទូទាត់អោយអ្នកលក់ផ្ទាល់) ជាធនាគារដែលធ្វើការចរចានិងត្រួតពិនិត្យជាមុនការឈានទៅដល់ការទូទាត់ទៅអោយអ្នកទទួលផលដោយក្រោមរូបភាពអាចផ្តល់ជាឥណទាន Negotiation និង Discount។
• Reimbursing Bank (ធនាគារដែលបានទូទាត់ អោយធនាគារអ្នកលក់ ឬអ្នកលក់) ជាធនាគារដែលធ្វើការទូទាត់អោយធនាគារដែលទទួលលិខិតឥណទាន ឬធនាគាររបស់អ្នកលក់ (Advising Bank) ជំនួសអោយធនាគារចេញផ្សាយលិខិតឥណទាន (Issuing Bank) ព្រោះពេលខ្លះធនាគារចេញផ្សាយលិខិតឥណទាន (Issuing Bank) អាចមានគណនីក្នុងធនាគារផ្សេងមួយទៀតដែលអាចធ្វើអោយមានភាពងាយស្រួលក្នុងការទូទាត់ទៅអោយធនាគារទទួលលិខិតឥណទាន (Advising Bank) ហើយ Reimbursing Bank ក៏អាចជា Issuing Bank ផងដែរនៅពេលមានការទូទាត់ដោយផ្ទាល់។
• The Carrier (ក្រុមហ៊ុនដឹកជញ្ជូន) ជាក្រុមហ៊ុនដឹកជញ្ជូនមានភារកិច្ចក្នុងការដឹកជញ្ជូនទំនិញ និងទទួលខុសត្រូវលើការបញ្ជូនទំនិញអោយទៅដល់គោលដៅដែលបានឯកភាពរវាងភាគីទាំងពីរ។
• The Insurer (ក្រុមហ៊ុនធានារ៉ាប់រង) ជាក្រុមហ៊ុនដែលមានតួនាទីផ្តល់នូវការធានារ៉ាប់រងលើទំនិញក្នុងពេលធ្វើការដឹកជញ្ជូនដោយធ្វើអោយស្របទៅតាមលក្ខខណ្ឌក្នុងលិខិតឥណទាន។ ភារកិច្ច
របស់ក្រុមហ៊ុនធានារ៉ាប់រងមានដូចជា៖ ធានារ៉ាប់រងលើឯកសារ Insurance Policies ឬ Insurance Certificate ដើម្បីបញ្ចៀសនូវហានិភ័យចំពោះទំនិញដោយសារការបាត់បង់ ឬខូចខាតជាដើម។
១.២.៥. ប្រភេទលិខិតឥណទាន
១.២.៥.១. Irrevocable Letter of Credit
Irrevocable Letter of Credit ជាលិខិតឥណទានដែលអ្នកទិញ (អ្នកនាំចូល) មិនអាចកែប្រែ ឬបញ្ឈប់ការទិញរបស់ខ្លួនវិញទោះបីជាមានការវិវដ្ត ឬប្រែប្រួលស្ថានភាពរបស់អ្នកទិញយ៉ាងក៏ដោយ លើកលែងតែមានការយល់ព្រមពីគូរភាគីទំាងសងខាង។ លិខិតឥណទានប្រភេទនេះ ធនាគារអ្នកទិញបានធានាលើការទូទាត់អោយទៅអ្នកលក់ជានិច្ច លើកលែងតែអ្នកលក់មិនអាចបំពេញតាមលក្ខខណ្ឌណាមួយ ឬក្នុងករណីមានហានិភ័យធ្ងន់ធ្ងរនៅក្នុងប្រទេសរបស់អ្នកទិញដូចជា៖ សង្រ្គាម ឬការប្រែប្រួលនៃនយោបាយផ្ទេរសាច់ប្រាក់ពីប្រទេសអ្នកទិញជាដើម។

រូបភាពទី១: ប្រភេទនៃលិខិតឥណទាន

១.២.៥.២. Revocable Letter of Credit
Revocable Letter of Credit ជាលិខិតឥណទានដែលទាំងអ្នកទិញ និងអ្នកលក់អាចធ្វើការកែសម្រួល ឬបញ្ឈប់ការបើលិខិតឥណទានរបស់ខ្លួនគ្រប់ពេលវេលា ដោយមិនចំាបាច់ផ្តល់ដំណឹង ឬមានការយល់ព្រមជាមុនពីលក់។ ក្រោយពីការធ្វើលុបចោលលិខិតឥណទាន ធនាគារអ្នកទិញមិនមានជាប់កាតព្វកិច្ចអ្វីទៀតទេជាមួយធនាគារអ្នកលក់។ ប៉ុន្តែលិខិតឥណទានប្រភេទនេះមានហានិភ័យខ្ពស់ណាស់សំរាប់អ្នកលក់ព្រោះគាត់មិនអាចទុកចិត្តបានថា អ្នកទិញនឹងព្រមទទួលយកទំនិញដែលបានផលិតរួចឬទេ?
១.២.៥.៣. Confirmed Letter of Credit
Confirmed Letter of Credit គឺជាប្រភេទលិខិតឥណទានដែលជាទូទៅចេញដោយធនាគារ មួយផ្សេងទៀត ឬជាធនាគារអ្នកលក់ផ្ទាល់ដែលមានទីតាំងនៅក្នុងប្រទេសអ្នកនាំចេញដោយធ្វើការធានាបញ្ជាក់បន្ថែមចំពោះអ្នកលក់ថាគាត់នឹងទទួលបានការទូទាត់។ ជាទូទៅការចេញលិខិតឥណទាន ប្រភេទនេះគឺកើតមានដោយការស្នើរសុំរបស់អ្នកនាំចេញ ឬអ្នកលក់ដើម្បីបញ្ជៀសនូវហានិភ័យនៃការខកខានមិនបានសងរបស់ធនាគារអ្នកទិញ (Issuing Bank) ដោយសារកត្តាមួយចំនួនដូចជា៖ ការក្ស័យ ធន ឬស្ថានភាពនយោបាយក្នុងប្រទេសដែលធនាគារអ្នកទិញ (Issuing Bank) ស្ថិតនៅ។
១.២.៥.៤. Unconfirmed Letter of Credit
Unconfirmed Letter of Credit មានលក្ខណៈផ្ទុយពី Confirmed Letter of Credit ដោយ វាពុំត្រូវបានបញ្ជាក់ ឬធានាពីធនាគារណាមួយទៅលើការទូទាត់ឡើយ។ ក្នុងន័យនេះធនាគារអ្នកលក់ Advising Bank គ្រាន់តែបញ្ជូននូវរាល់ឯកសារទៅកាន់អ្នកទទួលផលប៉ុណ្ណោះ ហើយធនាគារមិនមាន ការធានាលើការទូទាត់ទៅកាន់អ្នកទទួលផលក្រោមលក្ខខណ្ឌលិខិតឥណទានណាមួយឡើយ។
១.២.៥.៥. Standby Letter of Credit
Standby Letter of Credit ជាលិខិតឥណទានដែលមានលក្ខណៈដូចជា លិខិតធានាដែរគឺធនាគារបានធានាអត្ថប្រយោជន៍ជូនអ្នកទទួលផល។ នៅពេលដែលអ្នកអនុវត្តគំរោង ឬអ្នកទិញបរាជ័យលើការអនុវត្តកិច្ចសន្យា ធនាគារអ្នកទិញនឹងធ្វើការទូទាត់ទៅអោយអ្នកទទួលផលទៅតាមកិច្ចសន្យា ក្នុងលិខិតឥណទាន។
១.២.៥.៦. Transferable Letter of Credit
រូបភាពទី២: គំនូសបំព្រួញដំណើរការនៃប្រតិបត្តិការ Transferable Letter of Credit

Transferable Letter of Credit ជាលិខិតឥណទានដែលអនុញ្ញាតអោយអ្នកទទួលផលអាចស្នើសុំអោយធនាគារផ្ទេរការទូទាត់ទាំងស្រុង ឬក៏ចំណែកខ្លះដល់អ្នកលក់ ឬអ្នកផ្គត់ផ្គង់ម្នាក់ទៀត ដែលជាទូទៅគឺជាអ្នកផ្គត់ផ្គង់ទំនិញដំបូង។ លិខិតឥណទានប្រភេទនេះប្រើប្រាស់ដោយអ្នកផ្គត់ផ្គង់ ដែលមិនមែនជាអ្នកផ្គត់ផ្គង់ពិតប្រាកដ (អ្នកផ្គត់ផ្គង់ទី២) ឬអាចជាឈ្មួញកណ្តាលជួយរកអ្នកដែលអាច ផ្គត់ផ្គង់អោយដល់អ្នកទិញ។
១.២.៥.៧. Red Clause Letter of Credit
Red Clause Letter of Credit គឺជាលិខិតឥណទានម្យ៉ាងដែលមានការបញ្ជាក់ពិសេសមួយ ដោយជាធម្មតាសរសេរដោយពណ៌ក្រហមនៅក្នុងលិខិតឥណទានប្រភេទនេះ ដែលចេញដោយ ធនាគារអ្នកលក់ (Advising Bank) ដើម្បីផ្តល់ជាហិរញ្ញប្បទាន ឬការទូទាត់ទៅអោយអ្នកទទួលផល មុនពេលការដឹកជញ្ជូនទំនិញ ដែលវាអាចជួយសម្រួលដល់ការទិញវត្ថុធាតុដើមឬរៀបចំការដឹកជញ្ជូនទំនិញដោយយោងតាមលក្ខខណ្ឌក្នុងលិខិតឥណទាន។
១.២.៥.៨. Green Clause Letter of Credit
Green Clause Letter of Credit គឺជាលិខិតឥណទានមួយប្រភេទដែលអនុញ្ញាតអោយអ្នកទទួលផលទទួលបានឥណទានសំរាប់ការនាំចូលបែបជា Pre-Shipment Loan ឬ Packing Credit សំរាប់ទិញវត្ថុធាតុដើម ឬទំនិញផ្សេងៗ ល្គិកណាមានសំណៅឯកសារបញ្ជាក់នានាមានស្របតាមការបញ្ជាក់ក្នុងលិខិតឥណទាន។
១.២.៥.៩. Revolving letter of Credit
Revolving letter of Credit ជាលិខិតឥណទានមួយប្រភេទដែលប្រើប្រាស់សំរាប់ការដោះដូរ ទំនិញប្រភេទតែមួយច្រើនដងក្នុងកាលបរិច្ឆេទច្បាស់លាស់មួយដោយគ្មានការកែប្រែព្រមទាំងផ្លាស់ប្តូរ លក្ខខណ្ឌណាមួយក្នុងលិខិតឥណទាន។
១.២.៥.១០. Back-to-Back Letter of Credit
A Back-to-Back Letter of Credit គឺជាលិខិតឥណទានម្យ៉ាងដែលប្រើប្រាស់ខុសគ្នាពី Transferable Letter of Credit ដោយផ្ទេរលិខិតឥណទានច្បាប់ដើម (Original Letter of Credit or Master Letter of Credit) ទៅអោយអ្នកផ្គត់ផ្គង់ទី២។ នៅពេលទទួលលបានលិខិតឥណទានដោយ អ្នកផ្គត់ផ្គង់ទី១ពីធនាគារអ្នកលក់លិខិតឥណទាននោះ ត្រូវបានប្រើប្រាស់សំរាប់ផ្តល់ទំនុកចិត្តក្នុងការ ចេញជាលិខិតឥណទានមួយផ្សេងទៀត ទៅអ្នកផ្គត់ផ្គង់ទី២អាចជឿទុកចិត្តក្នុងការផ្គត់ផ្គង់ទំនិញទៅអោយអ្នកផ្គត់ផ្គង់ទី១។

រូបភាពទី៣: គំនូសបំព្រួញដំណើរការនៃប្រតិបត្តិការ Back-to-Back Letter of Credit

១.២.៥.១១. Assignment of Proceed
Assignment of Proceed គឺជាលិខិតឥណទានមួយប្រភេទ ដែលអ្នកទទួលផលមិនមែនជា អ្នកផ្គត់ផ្គង់ពិតប្រាកដ។ អ្នកទទួលផលអាចបែងចែកនូវផ្នែកខ្លះ ឬដំណើរការទាំងស្រុងនៃលិខិតឥណទានទៅអោយ ភាគីទី៣ (Assignee) ដែលជាអ្នកផ្គត់ផ្គង់អោយអនុវត្តកាតព្វកិច្ចទាំងនោះ ដោយចុះ កិច្ចសន្យាបង្កើត Assignment of Proceed នឹងមានទទួលស្គាល់ដោយធនាគាររបស់អ្នកលក់ ហើយអ្នកផ្គត់ផ្គង់អាចស្នើសុំហិរញ្ញប្បទានខ្លះ ឬទាំងស្រុង មុនពេលរៀបចំធ្វើការដឹកជញ្ជូន។
រូបភាពទី៤: គំនូសបំព្រួញដំណើរការនៃប្រតិបត្តិការ Assignment of Proceed

១.២.៦. ដំណើរការក្នុងការប្រតិបត្តិការលិខិតឥណទាន ដំណើរការក្នុងប្រតិបត្តិការលិខិតឥណទានមានទៅតាមដំណាក់កាលដូចខាងក្រោម៖
១. អ្នកលក់ និងអ្នកទិញធ្វើការព្រមព្រៀងគ្នាចុះកិច្ចសន្យា (Sale Contract) ដោយធ្វើការទិញលក់ នឹងធ្វើការទូទាត់តាមរយៈលិខិតឥណទាន។
២. អ្នកទិញធ្វើការទាក់ទងជាមួយធនាគារអ្នកទិញ (Issuing Bank) ដែលនៅក្នុងប្រទេសរបស់ខ្លួន ដោយបំពេញបែបបទ ស្នើសុំធនាគារអោយចេញលិខិតឥណទានទៅអោយអ្នកលក់។
៣. ធនាគាររបស់អ្នកទិញ (Issuing Bank) ធ្វើការរៀបចំឯកសារលិខិតឥណទានទៅកាន់ធនាគាររបស់អ្នកលក់ (Advising Bank) តាមប្រព័ន្ធទូរគមនាគមន៍។ ធនាគាររបស់អ្នកលក់នឹងពិនិត្យមើលទៅលើសំណើរឯកសាររបស់អ្នកទិញស្ថិតក្រោមរូបភាពនៃលិខិតឥណទាន។
៤. ក្រោយពីពិនិត្យឃើញថាមានភាពត្រឹមត្រូវ និងស្របច្បាប់ហើយ ធនាគារអ្នកលក់នឹងបញ្ជូនលិខិតឥណទានទៅអោយអ្នកលក់ ឬអ្នកទទូលផល (Beneficiary)។
៥. អ្នកលក់នឹងពិនិត្យមើលលើឯកសារដែលតម្រូវអោយមាននៅក្នុងលិខិតឥណទាន ដើម្បីធានា បានថាអ្នកលក់អាចឆ្លើយតបនិងលក្ខខណ្ឌក្នុងលិខិតឥណទាន ហើយធ្វើការដឹកជញ្ជូនទំនិញចេញដោយធ្វើយ៉ាងណាត្រូវរៀបចំឯកសារតម្រូវភា្ជប់ជាមួយលិខិតឥណទាន ដើម្បីបង្ហាញទៅកាន់ធនាគាររបស់ខ្លួន (Advising Bank) ឬធនាគារ (Negotiation Bank) ដើម្បីស្នើសុំធ្វើការទូទាត់។
៦. ក្នុងករណីមានការកែប្រែលិខិតឥណទាន ដោយសារអ្នកលក់មិនអាចបំពេញទៅតាមលក្ខខណ្ឌរបស់អ្នកទិញ នោះអ្នកលក់ត្រូវជំរាបដល់អ្នកទិញភ្លាម ដើម្បីសុំធ្វើការកែប្រែលិខិតឥណទាន។
៧. នៅពេលមានការព្រមព្រៀងកែប្រែលិខិតឥណទានរវាងអ្នកលក់ និងអ្នកទិញរួចមក នោះពួកគេអាចធ្វើការកែប្រែ ព្រមទាំងបញ្ចូលចំនុចផ្សេងៗទៅក្នុងលក្ខខណ្ឌនៃលិខិតឥណទាន។ រួចហើយ ធនាគារអ្នកលក់នឹងពិនិត្យមើលលិខិតឥណទានម្តងទៀត និងបញ្ជូនមកអោយអ្នកលក់សារជាថ្មី។
៨. អ្នកលក់រៀបចំដឹកទំនិញបញ្ជូន និងប្រមូលឯកសារដែលមានចែងក្នុងលិខិតឥណទានប្រគល់អោយធនាគារអ្នកលក់ (Advising Bank) ទៅតាមពេលកំណត់។ ធនាគារនឹងពិនិត្យមើលលើ ឯកសារមានភាពត្រឹមត្រូវហើយ នឹងបញ្ជូនឯកសារនោះទៅកាន់ធនាគារអ្នកទិញ(Issuing Bank)។
៩. នៅពេលដែលឯកសារបានមកដល់ធនាគារអ្នកទិញ (Issuing Bank) នឹងធ្វើការត្រួតពិនិត្យឯកសារទាំងនោះ ថាតើវាបានឆ្លើយតបនិងលក្ខខណ្ឌរបស់លិខិតឥណទានដែរឬទេ ។ ក្រោយពីបានពិនិត្យមើលថាឯកសារពិតជាត្រឹមត្រូវអស់ហើយធនាគារអ្នកលក់នឹងធ្វើការទូទាត់ជាលក្ខណៈ Sight payment ឬ Usance payment។ ហើយធនាគារអ្នកទិញនឹងធ្វើការទូទាត់ជាមួយអ្នកទិញដោយផ្ទាល់។
១០. អ្នកទិញទទួលបានឯកសារតម្រូវគ្រប់គ្រាន់ អ្នកទិញអាចយកឯកសារទាំងអស់នោះ ដើម្បីបើក យកទំនិញពីក្រុមហ៊ុនដឹកជញ្ជូនបាន។ នៅពេលអ្នកទិញទទួលបានទំនិញ ហើយអ្នកលក់ទទួលបាន ការទូទាត់ ពេលនោះប្រតិបត្តិការលិខិតឥណទានត្រូវបានបញ្ចប់។
១.២.៧. មធ្យោបាយនៃការទូទាត់ នៅក្នុងលិខិតឥណទាន ត្រូវបានគេកំណត់នូវប្រភេទនៃការទូទាត់ជាពីរប្រភេទគឺ៖
១.២.៧.១. ការទូទាត់តាមបែប Sight Payment ការទូទាត់តាមរយៈ Sight Payment គឺត្រូវមានការព្រមព្រៀងតាំងពីការចាប់ផ្តើមចុះកិច្ចសន្យា ជាមួយអ្នកលក់ និងអ្នកទិញ (Term of Payment)។ តាមរយៈការទូទាត់ប្រភេទនេះគឺ មានន័យថារាល់ ការទូទាត់នឹងធ្វើឡើងភ្លាមៗ នៅពេលដែលឯកសារបានបញ្ជូនមកដល់ធនាគារអ្នកទិញវិញ (Issuing Bank) ហើយឯកសារទាំងនោះត្រូវតែស្របទៅតាមលក្ខខណ្ឌដែលមានចែងក្នុងនៃលិខិតឥណទាន។
១.២.៧.២ ការទូទាត់តាមបែប Usance
ក. ការទូទាត់តាមបែប Deferred Payment Deferred Payment គឺជាការទូទាត់ដែលអ្នកទទួលផល (Beneficiary) អាចទទួលបាននូវ ការទូទាត់នៅពេលអនាគតជាក់លាក់ណាមួយដែលបានកំណត់ បន្ទាប់ពីឯកសារបានទៅដល់ធនាគារ អ្នកទិញ (Issuing Bank)។ ភាគច្រើនការទូទាត់តាមរយៈ Deferred Payment ត្រូវធ្វើឡើងក្រោយពេល ៣០ ទៅ ៦០ថ្ងៃ បន្ទាប់ពីការចេញឯកសារដឹកជញ្ជូន (Bill of Lading)។
ខ. ការទូទាត់តាមបែប Acceptance Payment
ជាការទូទាត់ទៅអោយអ្នកលក់នៅពេលអនាគតរយៈពេល ៩០ថ្ងៃតាមរយៈ Sight Payment ឬ១២០ថ្ងៃតាមបែប Sight ដោយអ្នកទទួលផលដករូបិយាណត្តិ (Bill of Exchange ឬ Draft)។ ធនាគារអ្នកទិញ (Issuing Bank) និងទទួលយក Draft ពីអ្នកលក់នៅពេលបានពិនិត្យឃើញថា ឯកសារត្រឹមត្រូវទៅតាមលក្ខខណ្ឌលិខិតឥណទាន។ ក្រោយពីទទួលបាន Draft ហើយអ្នកលក់អាចលក់ Draft នោះភ្លាមៗ នៅក្នុងរូបភាពជា Discount ឬរក្សាទុករង់ចាំការទូទាត់រហូតដល់ថ្ងៃផុតកំណត់នៃលិខិតឥណទានក៏បាន។ ប្រសិនបើ Draft លក់ Discount អ្នកលក់ត្រូវចំណាយលើកម្រៃ Discount អោយធនាគារ ឬការប្រាក់ទៅតាមកិច្ចសន្យា។
គ. ការទូទាត់តាមបែប Negotiation អ្នកទទួលផល (Beneficiary) អាចដកយក Draft ពីធនាគារអ្នកទិញ (Issuing Bank) ឬធនាគារអ្នកលក់ (Confirming Bank) រួចយកទៅធនាគារអ្នកលក់ដដែល ដែលជាធនាគារ (Negotiation Bank) ដើម្បីទទួលការទូទាត់មុន។ ជាទូទៅ ធនាគារអ្នកលក់ (Negotiation Bank) អាចជាធនាគារចេញផ្សាយខ្លួនឯង ធនាគារដែលស្នើសុំដោយធនាគារអ្នកទិញ (Issuing Bank) ឬធនាគារដ៏ទៃទៀត ដោយផ្អែកទៅលើកិច្ចសន្យាព្រមព្រៀងរបស់ធនាគារអ្នកទិញ (Issuing Bank)។
១.២.៨. ឯកសារដែលពាក់ព័ន្ធក្នុងប្រតិបត្តិការលិខិតឥណទាន
១.២.៨.១ ឯកសារពាណិជ្ជកម្ម (Commercial Document)
 Commercial Invoice (វិក្កយបត្រពាណិជ្ជកម្ម) គឺជាធម្មតាតម្រូវអោយមានជាចាំបាច់។ វាត្រូវបញ្ជក់ថាអ្នកនាំចូលទាមទារអោយមានវិក្កយបត្រថតចំឡង ដែលមានចុះហត្ថលេខា ឬវិក្កយបត្រថតចំឡងតាមច្បាប់ដើម ហើយបញ្ជាក់ពីចំនួនច្បាប់ថតចំឡងដែលត្រូវការ។ ក្នុងនេះរួមមានឈ្មោះអ្នកទទួលផល, បញ្ជីរាយ, មុខទំនិញ និងតម្លៃ។ល។
 Certified Invoice នៅក្នុង Certified Invoice បង្ហាញពីប្រភេទនៃទំនិញ ព្រមទាំងប្រភពដើមរបស់ទំនិញនោះនិងបញ្ជាក់ថាទំនិញនោះពិតជាត្រូវទៅតាមតម្រូវការរបស់អ្នកទិញ ។
 Certificate of Analysis គឺជាវិញ្ញាបនបត្រដែលបានបញ្ជាក់និងបង្ហាញពីប្រភេទ និងមានការវិភាគច្បាស់លាស់ពីគ្រឿងផ្សំរបស់ទំនិញទាំងនោះ។
 Certificate of Weight ជាវិញ្ញាបនបត្រទំងន់ ដែលបញ្ជាក់អំពីកម្រិតទំងន់ពិតប្រាកដរបស់ទំនិញដែលបានដឹកជញ្ជូននាំចេញ។
 Inspection Certificate ជាវិញ្ញាបនបត្រដែលត្រួតពិនិត្យត្រូវបានចេញ ដោយភ្នាក់ងារដែលស្ថិតក្នុប្រទេសអ្នកនាំចូល ដើម្បីធានាដល់គុណភាពពិតប្រាកដរបស់ទំនិញ។ ក្នុងករណី អ្នកនាំចូលត្រូវបញ្ជាក់អោយបានច្បាស់អ្នកណាជាអ្នកចេញវិញ្ញាបនបត្រនេះ ព្រោះវាចាំបាច់នៅពេលធនាគារទទួលយក និងធ្វើការត្រួតពិនិត្យឯកសារ។
 Packing List ជាបញ្ជីមួយដែលរៀបរាប់ការវេចខ្ចប់ទំនិញដែលត្រូវដឹកជញ្ជូនដែលអាចជួយអោយអ្នកនាំចូលមានភាពងាយស្រួលក្នុងការរៀបចំនូវសន្និធិ និងបែងចែកទំនិញ។
 Weight List/ Weight Note ឯកសារដែលបញ្ជាក់ពីទំងន់របស់ទំនិញ។
១.២.៨.២. លិខិតបទដ្ឋាន (Official Document)
 Certificate of Origin ជាប័ណ្ណប្រភពទំនិញ
 Blacklist Certificate ជាប័ណ្ណបញ្ជាក់ពីទំនិញក្នុងបញ្ជីខ្មៅ
 Customs Invoice ជាវិក័យប័ត្រគយ
 Health Certificate ជាឯកសារដែលបញ្ជាក់ពីគុណភាពរបស់ទំនិញ និង គុណភាពសំរាប់ការ រក្សាទុករបស់ទំនិញ។

១.២.៨.៣. ឯកសារហិរញ្ញវត្ថុ (Financial Document)
 Bill of Exchange ជារូបិយាណត្តិ ដែលបានចាត់ជាឯកសារដែលបានបញ្ជាក់ពីថ្ងៃ និងចំនួនទឹកបា្រក់ដែលសំរាប់ធ្វើការទូទាត់ ដែលចេញដោយអ្នកទិញ។
១.២.៨.៤.ឯកសារធានារ៉ាប់រង ( Insurance Document)
 Insurance Policies ជាឯកសារដែលបញ្ជាក់ពី ចំនួន, ប្រភេទនៃទំនិញ, ហានិភ័យដែលធ្វើការធានារ៉ាប់រង និងការបញ្ជាក់ពីកាលបរិច្ឆេទច្បាស់លាស់លើការធានារ៉ាប់រងនោះ។
 Insurance Certificate ជាឯកសារឬវិញ្ញាបនបត្រដែលតម្រូវអោយមានការទទួលខុសត្រូវលើទំនិញដោយបញ្ចៀសនូវហានិភ័យលើខូចខាត នៅពេលដឹកជញ្ជូនទៅអោយអ្នកទិញ។
១.២.៨.៥. វិក្កយបត្រដឹកជញ្ជូន (Transport Bill)
 Bill of Lading ជាឯកសារប្រើប្រាស់សំរាប់ការដឹកជញ្ជូនតាមសមុទ្រពីកំពង់ផែមួយទៅកំពង់ផែមួយទៀត។
 Multimodal Document ជាឯកសារដែលបង្ហាញពីការដឹកជញ្ជូនទំនិញច្រើនជាងមួយប្រភេទ ឧទាហរណ៍ ដឹកជញ្ជូនតាមនាវា និងតាមរថយន្តផងដែរ។
 Airway Bill ជាឯកសារដឹកជញ្ជូនសំរាប់ការដឹកជញ្ជូនដោយផ្លូវអាកាស ហើយមានបញ្ជាក់ពីអ្នកដែលមានសិទ្ធទទួលទំនិញ។
 Railway Receipt ឯកសារដឹកជញ្ជូនសំរាប់ការដឹកជញ្ជូនតាមរថយន្ត ឬរថភ្លើងដែលបានបញ្ជាក់ពីអ្នកដែលមានសិទ្ធទទួលទំនិញ។
១.២.៩. កំហុសឆ្គងដែលកើតមាននៅក្នុងប្រតិបត្តិការលិខិតឥណទាន ជាធម្មតា កំហុសឆ្គងភាគច្រើនកើតមានឡើងលើឯកសារតម្រូវដែលអ្នកនាំចេញត្រូវបំពេញ ដូចនេះហើយបើមានកំហុសឆ្គង ឬមិនអាចបំពេញបានទៅតាមលក្ខខណ្ឌលិខិតឥណទាន អ្នកនាំចេញត្រូវធ្វើការសុំកែប្រែ ដោយមានការឯកភាពពីអ្នកនាំចូល ឬអ្នកទិញភ្លាម។ ធនាគារនឹងដើរតួនាទីក្នុងការត្រួតពិនិត្យឯកសារទាំងនោះ។ កំហុសឆ្គងទាំងនោះរួមមាន៖
- លិខិតឥណទានហួសកាលកំណត់ The L/C has expired
- រូបិយាណត្តិ (Bill of Exchange) ត្រូវបានដកដោយភាគីទី៣ ឬភាគីដែលមិនបានពាក់ព័ន្ធក្នុងលិខិតឥណទាន
- ចំនួនទឹកប្រាក់ក្នុងវិក័យបត្រពាណិជ្ជកម្ម (Commercial Invoice) តិចជាងចំនួនទឹកប្រាក់ដែលបានកំណត់ក្នុងលិខិតឥណទាន
- ការដឹកទំនិញមានការយឺតយ៉ាវ
- ឯកសារត្រូវបានខកខានមិនអាចបង្ហាញទៅធនាគារទាន់ពេលវេលា
- Bill of Lading មិនបានបញ្ជាក់ច្បាស់លាស់ពី Incroterms ក្នុងការដឹកជញ្ជូន
- ការបញ្ជូនទំនិញមកកាន់កំពង់ផែផ្សេង ខុសពីការចរចាក្នុងលិខិតឥណទាន
- ហានិភ័យលើការធានារ៉ាប់រងមិនបានបង្ហាញក្នុងលិខិតឥណទាន
- ឯកសារធានារ៉ាប់រងមិនបានបង្ហាញច្បាស់លាស់ ដោយភ្ជាប់ជាមួយលិខិតឥណទានដូចជា៖ ឯកសារបញ្ជាក់ពីលើវិញ្ញាបនបត្រធានារ៉ាប់រង (Insurance cover note) និង វិញ្ញបនបត្រធានារ៉ាប់រង Insurance certificate ជាដើមដែលត្រូវតែមានក្នុងឯកសារតម្រូវ។
- ចំនួនទឹកប្រាក់ ឬរូបិយវត្ថុ មានលក្ខណៈខុសគ្នាទៅនិងការកំណត់ក្នុងលិខិតឥណទាន
- គ្មានឯកសារបញ្ជាក់ថាទំនិញពិតជាបានត្រូវគេដឹកជញ្ជូនមក
- ការរាយមុខទំនិញក្នុងលិខិតឥណទានខុសគ្នាទៅនិងបញ្ជីរាយនាមទំនិញក្នុងវិក័យបត្រ
- ឯកសារដែលបញ្ជាក់ពីទំងន់របស់ទំនិញ មានភាពខុសគ្នាពីអ្វីបានកំណត់ក្នុងលិខិតឥណទាន
- ឯកសារតម្រូវដោយអ្នកនាំចូលក្នុងលិខិតឥណទានមិនអាចបំពេញបានដោយអ្នកនាំចេញ។
១.២.១០. ហានិភ័យពាក់ព័ន្ធនៃប្រតិបត្តិការលិខិតឥណទាន នៅក្នុងដំណើរការលិខិតឥណទានមានហានិភ័យមួយចំនួនដែលអាចជួបប្រទះ ដូចជា៖
១.២.១០.១. ហានិភ័យចំពោះអ្នកនាំចូល (Risk to Applicant)
• ការមិនបញ្ជូនទំនិញមកអោយអ្នកទិញ
• ការដឹកទំនិញមានរយៈចម្ងាយជិត
• គុណភាពទំនិញអាចមិនដូចមានចែងក្នុងលិខិតឥណទាន
• ការបញ្ជូនទំនិញមិនទាន់ពេលវេលា
• ទំនិញខូចខាតក្នុងពេលដឹកជញ្ជូន
• កំហុសធនាគារអ្នកទិញ (Issuing Bank) ដោយមិនអាចរៀបចំឯកសារទាន់ពេលវេលា
១.២.១០.២. ហានិភ័យចំពោះអ្នកនាំចេញ (Risk to Beneficiary)
• មិនអាចធ្វើបាន ឬមិនគោរពទៅតាមលកខណ្ឌតម្រូវរបស់អ្នកទិញ ឬអ្នកនាំចូល
• មានការពន្យាពេលនៃការទូទាត់ចំពោះទំនិញ ឬសេវាកម្ម
១.២.១០.៣. ហានិភ័យចំពោះធនាគារអ្នកទិញ (Risk to Issuing Bank)
• ការមិនធ្វើការទូទាត់របស់អ្នកទិញ ឬអ្នកនាំចូល
• ហានិភ័យនៃការក្លែងបន្លំ ហានិភ័យនៃបញ្ញត្តិនានា និងហានិភ័យលើប្រព័ន្ធច្បាប់
១.២.១០.៤. ហានិភ័យចំពោះធនាគារអ្នកលក់ (Risk to Advising Bank)
• ចំពោះធនាគារ Advising Bank គឺមានកាតព្វកិច្ចចំពោះការពិនិត្យមើលទៅឯកសារដែលបញ្ជូនដោយធនាគារអ្នកទិញ និងបន្តទៅកាន់អ្នកទទួលផល នឹងធ្វើការទូទាត់បន្ទាប់ពីធនាគារអ្នកទិញ Issuing Bank ឯកភាពចំពោះឯកសារដែលបានបញ្ជូន។
• ចំពោះធនាគារ Nominated Bank គឺមានហានិភ័យចំពោះការមិនទទួលបានការទូទាត់ពីធនាគារ Issuing Bank ប្រសិនបើការពិនិត្យមើលឯកសារមិនបានគោរពទៅតាមលក្ខខណ្ឌនៅក្នុង លិខិតឥណទាន។
• ចំពោះធនាគារ Confirming Bank គឺមិនអាចទទួលបានការទូទាត់ដូចគ្នានិងធនាគារ Nominated Bank ប្រសិនបើការបញ្ជាក់ចំពោះឯកសាររបស់ធនាគារ Confirming Bank ត្រូវបានបដិសេធ ឬមិនទទួលយកដោយធនាគារអ្នកទិញ Issuing Bank។
១.២.១០.៥. ហានិភ័យផ្សេងៗ
• Sovereignty and Regulatory Risk : សំដៅដល់សកម្មភាពរបស់រដ្ឋាភិបាលទប់ស្កាត់លើ ប្រតិបត្តិការលិខិតឥណទាន ដោយស្ថិតនៅក្រៅការត្រួតពិនិត្យរបស់ភាគីទាំងអស់
• Fraud Risk : ការទូទាត់នឹងមិនអាចកើតឡើង ប្រសិនបើការរកឃើញបានបង្ហាញថារាល់ឯកសារមានការ ក្លែងបន្លំឬធ្វើការទូទាត់មិនគ្រប់ទៅតាមតម្លៃដែលបានព្រមព្រៀង។
• Legal Risk : ប្រតិបត្តិការរបស់លិខិតឥណទានអាចត្រូវបានរាំងស្កាត់ ដោយច្បាប់ដែលមានទំនាក់ទំនងផ្ទាល់ទៅនឹងសិទ្ធរួមទំាងកាតព្វកិច្ចរបស់ដៃគូរពាណិជ្ជកម្មយោងតាមលក្ខខណ្ឌលិខិតឥណទាន។
• Force Majeure and Frastration of Contract : ការអនុវត្តកាតព្វកិច្ចក្នុងកិច្ចសន្យាត្រូវបានរារាំង ដោយសារកត្តាខាងក្រៅមួយចំនួនមានដូចជា៖ សង្រ្គាម ឬ គ្រោះធម្មជាតិ។
• Credit Risk : ជាហានិភ័យលើឥណទានដែលអាចកើតមានឡើង។
• Exchange Rate Risk : ជាហានិភ័យដែលបណ្តាលមកពីការប្រែប្រួលនៃអត្រាប្តូរប្រាក់បរទេស។
• ហានិភ័យផ្សេងៗទៀតអាចបណ្តាលមកពី កត្តាភាសា ច្បាប់ និងវប្បធម៌ខុសគ្នា។
១.២.១១. គុណសម្បត្តិ និងគុណវិប្បត្តិរបស់លិខិតឥណទាន
១.២.១១.១. គុណសម្បត្តិរបស់លិខិតឥណទាន
ក. គុណសម្បត្តិចំពោះអ្នកនាំចេញ ឬអ្នកទទួលផល
• ធានាចំពោះការទូទាត់ : អ្នកទទួលផលអាចធានាបានថារាល់ការទូទាត់នានាត្រូវតែទទួលបាន ការទូទាត់ពីធនាគារអ្នកទិញជាកំហិត នៅពេលឯកសារស្របទៅតាមលក្ខខណ្ឌលិខិតឥណទាន។
• អាចទទួលបានហិរញ្ញប្បទានតាមរយៈការចរចា (Ready Negotiability) : ប្រសិនបើអ្នកនាំចេញត្រូវការសាច់ប្រាប់ភ្លាមៗ គាត់នឹងទទួលបាននូវការចរចា (Negotiation) មួយយ៉ាងងាយស្រួល នៅពេលគាត់មានឯកសារត្រឹមត្រូវ។ ពេលនោះគាត់នឹងទទួលបានហិរញ្ញប្បទានបែប Discounted។
• ស្របតាមផ្លូវច្បាប់ (Compliance with regulation) : ចំពោះលិខិតឥណទាន គឺជាភស្ថុតាងមួយយ៉ាងសំខាន់ដែលបង្ហាញថាការដោះដូរត្រូវតែធ្វើតាមនីតិវិធី និងបទបញ្ញត្តិត្រឹមត្រូវទៅតាមតម្រូវការកំណត់របស់លក្ខខណ្ឌរបស់អ្នកនាំចូល។
• អាចទទួលបានឥណទានបែប Pre-Shipment (Pre - Shipment Facility) : អ្នកនាំចេញនឹង អាចទទួលបានការធានាចំពោះការទូទាត់ ជាមុនពីធនាគារតាមរយៈឥណទាន Pre-shipment Loan ដោយលិខិតឥណទានមានលក្ខណៈត្រឹមត្រូវ ហើយសមស្របទៅតាមលក្ខខណ្ឌតម្រូវ។
ខ. គុណសម្បត្តិចំពោះអ្នកនាំចូល ឬអ្នកទិញ
• ទទួលបាននូវការផ្តល់នូវហិរញ្ញប្បទានសំរាប់ការទូទាត់ នៅពេលឯកសារត្រឹមត្រូវទៅតាមលក្ខខណ្ឌដោយធនាគារអ្នកទិញ (Issuing Bank) ធនាគារអ្នកទិញនិងធ្វើការទូទាត់ជាមុន ដោយជួយផ្តល់ជាហិរញ្ញប្បទាន ជាមុនចំពោះអ្នកទិញ។
• ធានាបាននូវការទទួលទំនិញមានសុវត្ថិភាព ធនាគារដែលចេញលិខិតឥណទានត្រូវធ្វើការពិនិត្យថាតើរាល់លើឯកសារថាពិតជាត្រឹមត្រូវតាមលក្ខខណ្ឌរបស់លិខិតឥណទាន។ ដូចនេះ វាអាចធ្វើអោយមានទំនុកចិត្តចំពោះអ្នកនាំចូលនូវរាល់ទំនិញ និងមានដូចក្នុងឯកសារដែលតម្រូវ។
១.២.១១.២. គុណវិប្បត្តិរបស់លិខិតឥណទាន
ក. គុណវិប្បត្តិចំពោះអ្នកនាំចូល ឬអ្នកទិញ
• ឯកសារក្លែងបន្លំ : អ្នកទទូលផល ឬអ្នកលក់មានភារៈផ្គត់ផ្គងនូវឯកសារអោយស្របទៅតាមលក្ខខណ្ឌលិខិតឥណទាន ដើម្បីគាត់អាចទទួលបាននូវការទូទាត់មួយ ប៉ុន្តែបើការក្លែងបន្លំឯកសារកើតមានឡើងនោះ អ្នកទទួលផលនិងមានឧកាសក្នុងការផ្គត់ផ្គង់ទំនិញដែលខុសពីការចែងនូវក្នុងឯកសារ ដូចនេះអ្នកទិញ ឬអ្នកនាំចូលអាចជួបនូវហានិភ័យ។
• ការចំណាយថ្លៃសេវាកម្ម : ធនាគារអ្នកទិញ (Issuing Bank) និងធ្វើការគិតទៅលើកម្រៃ សេវាកម្មនៃការចេញលិខិតឥណទានជូនដល់អ្នកទិញ។
• កម្រិតបន្ទាត់ឥណទាន : ការទទួលបាននូវកំរិតបន្ទាត់ឥណទានពីធនាគារអ្នកទិញ (Issuing Bank) អាចអោយធ្វើអ្នកទិញបាត់បង់ទៅលើការចំណាយការប្រាក់ នៅពេលប្រើប្រាស់សេវាកម្មនេះ។ ម្យ៉ាងទៀតការប្រើប្រាស់សេវាកម្មកម្រិតបន្ទាត់ឥណទានធ្វើអោយអ្នកទិញត្រូវតម្កល់នូវទ្រព្យធានា។
• ប្រែប្រួលលំហូរសាច់ប្រាក់ : អ្នកទិញ ឬអ្នកនាំចូលអាចមានបញ្ហានូវលំហូរសាច់ប្រាក់នៅពេលគាត់ដាក់បញ្ចាំទ្រព្យធានា និងអាជីកម្មរបស់អ្នកនាំចូលផងដែរ។
• ការពន្យាពេលរបស់ឯកសារ : ការពន្យាពេល ឬការខកខានទទួលឯកសារច្រើនកើតឡើងចំពោះអ្នកទិញ ហើយការយឹតយ៉ាវនេះធ្វើអ្នកទិញមិនអាចទទួលបានទំនិញពីក្រុមហ៊ុនដឹកជញ្ជូន។
• ការពន្យាពេលនូវការបញ្ជូនទំនិញ : ការខកខានដឹកជញ្ជូនទំនិញមិនទាន់ពេលវេលាគឺអាចបណ្តាលមកពីកត្តាមួយចំនួន។ ប្រសិនបើអ្នកទិញទំនិញសន្យាថានឹងផ្គត់ផ្គង់ទំនិញទៅកាន់អតិថិជនរបស់ខ្លួនហើយបែរជាមិនអាចធ្វើបានទៅវិញ ដោយសារការមិនអាចបញ្ជូនទំនិញទាន់ពេលវេលានោះអ្នកនាំចូលអាចបាត់បង់នូវសេចក្តីទុកចិត្ត ប្រាក់កាស និងពេលវេលា។
ខ. គុណវិប្បត្តិចំពោះអ្នកនាំចេញ ឬអ្នកទទួលផល
• កំហុសឆ្គងក្នុងឯកសារ : ប្រសិនបើអ្នកនាំចេញមានភាពស្រពិចស្រពិលលើលក្ខខណ្ឌក្នុងលិខិតឥណទានជាកត្តាដែលអាចបណ្តាលអោយមានការរៀបចំឯកសារ មិនបានត្រឹមត្រូវសំរាប់បញ្ជូន មកកាន់ធនាគារដើម្បីធ្វើការទូទាត់។
• លក្ខខណ្ឌក្នុងលិខិតឥណទានមានលក្ខណៈពិបាក និងស្មុកស្មាញ : តម្រូវការចំពោះឯកសារ និងលក្ខខណ្ឌនានាមានភាពស្មុកស្មាញពិបាកក្នុងការបំពេញតាម ឬក៏ អាចស្វែងរកតម្រូវទៅតាម លក្ខខណ្ឌក្នុងលិខិតឥណទាន។
• ភាសាខុសគ្នា : អ្នកនាំចេញអាចមានបញ្ហាចំពោះភាសាដែលបានសរសេរលើលិខិតឥណទាន ព្រោះពួកគាត់អាចមិនចេះនូវភាសាទាំងនោះ ដែលវាជាកត្តាបណ្តាលអោយមានកំហុសនូវ នៅពេលបញ្ជូនឯកសារទៅកាន់ធនាគារ។
• ការពន្យាពេលការបញ្ជូនឯកសារ : វាកើតឡើងនូវពេលដែលឯកសារមិនអាចទៅដល់ដៃអ្នកនាំចូលទាន់ពេលវេលា ដោយសារតែឯកសារនោះគឺត្រូវបានឆ្លងកាត់ធនាគារផ្សេងៗច្រើន។
• ការពន្យាពេលសំរាប់ការដឹកជញ្ជូនទំនិញ : ពេលខ្លះទំនិញនឹងត្រូវធ្វើការពន្យាពេលស្ថិតក្រោមរូបភាពជាច្រើនប្រភេទ។ ហេតុនេះ ការពន្យាពេលនៃការដឹកជញ្ជូនទំនិញអាចនាំអោយមានការបាត់បង់នូវការទុកចិត្តរវាងអ្នកនាំចូលនិងអ្នកនាំចេញ ហើយធ្វើអោយការខកខានដល់ជំនួញលើកក្រោយ ។
១.២.១២. អ្វីដែលត្រូវធ្វើនៅពេលលិខិតឥណទានត្រូវបានបដិសេធ ប្រសិនបើការបញ្ជូនឯកសារមកកាន់ធនាគារអ្នកលក់ (Advising Bank) រួចបញ្ជូនទៅកាន់ធនាគារ Issuing Bank ឬធនាគារ Confirming Bank ត្រូវបានគេបដិសេធ នោះអ្នកលក់ត្រូវអនុវត្តដូចខាងក្រោម៖
• បន្ទាប់ការត្រួតពិនិត្យឯកសាររួចមក ហើយធនាគារបានបង្ហាញថាឯកសារដែលមានកំហុស នោះធនាគារនឹងផ្តល់រយៈពេលចំនួន ៥ថ្ងៃសំរាប់ធ្វើការតវ៉ា ឬធ្វើការកែតម្រូវ។
• ធ្វើការកែប្រែលិខិតឥណទានដោយអ្នកនាំចេញ និងមានការព្រមព្រៀងជាមួយអ្នកនាំចូល។ ការកែប្រែនេះអាចធ្វើអោយហានិភ័យនៃការទូទាត់កាន់តែមានតិច។
• អ្នកលក់អាចស្នើទៅកាន់ធនាគារអ្នកលក់(Advising Bank) ដោយអោយធនាគារនេះស្នើបន្តទៅកាន់ធនាគារអ្នកទិញ(Issuing Bank) ដើម្បីធ្វើការទូទាត់ទោះបីជាមានកំហុសលើឯកសារក៏ដោយ។
• អ្នកលក់ ឬអ្នកនាំចេញធ្វើការធានាចំពោះឯកសារដោយផ្តល់ធនាគារនូវសំណងដោយអោយ ធនាគារធ្វើការទូទាត់ទោះបីជាឯកសារមានកំហុសក៏ដោយ។
• ធ្វើការបញ្ជូនឯកសារទៅកាន់ធនាគារអ្នកទិញ (Issuing Bank) ដោយមានការចរចាដោយផ្ទាល់រវាងអ្នកលក់ និងអ្នកទិញ នោះអ្នកលក់អាចទទួលបាននូវការទូទាត់ដោយប្រើប្រាស់ Collection Basis។