PANIMULA
Tayo ay pumapasok sa paaralan upang may matutunan,masuklian ang paghihirap ng ating mga magulang,makapagtapos ng pag-aaral at magkaroon ng magandang buhay. Pero sa pagpasok natin sa paaralan ay hindi maiiwasan ang pagkakaroon ng mga kaibigan at mapabilang sa iba’t ibang grupo o organisasyon. Dalawa sa mga grupong sinasalihan ng mga estudyante ngayon ay ang fraternity at sorority.
Ano nga ba ang fraternity at sorority? Ito ay isang samahan ng mga kabataan partikular sa mga mag-aaral sa kolehiyo. Ang mga miyembro nito ay may tawagan na "sis" para sa mga kamyembrong babae at "bro" sa mga lalaki. Sa madaling salita, isinusulong nito ang sistemang "kapatiran". Ang organisasyong ito ay siyang nagsisilbing dungawan ng mga estudyanteng hinahanap ang pangangailangang hindi nakikita sa pamilya o kaya naman ay para mapawi ang kalungkotang nadarama na hindi kapiling ang pamilya. Ayon sa ibang tao, ito raw ay nakatutulong kapag ikaw ay nakapagtapos lalo na sa paghahanap ng trabaho. Napauunlad pa nito ang katangiang sosyal ng miyembro dahil sa mga itinatatag na pagtitipon at nadaragdagan ang bilang ng mga kaibigan, kakilala at kakampi. May mga fraternity na may magandang misyon, layunin at maging pananaw. Ngunit sa paglipas ng panahon nasisira ang mga imahe ng ibang mga grupo na may matinong hangarin dulot ng kawalang hiyaang ginagawa ng ibang fraternity lalo na pag ang chapters ay mga kabataan ang ka-brad.
Mabuti nga bang sumali ang mga mag – aaral kung maraming mga estudyante ang namimiligro ang buhay at namatay. Nasaan ba ang pagkakapatiran kung nakikita mo ang iyong kapwa na pinapalo at pinapaso na walang kasalanan? Nasaan ba ang pagdadamayan kung ang epekto ng fraternity at sorority ay nasasaktan ka na at umiiyak dahil sa sakit ng katawan. Iyan ba ang sinasabi nilang pagkakapatiran at pagdadamayan? Tayo ay nasa paaralan upang sa ganoon ay masuklian natin ang pagpapagod ng ating mga magulang sa paghahanapbuhay at hindi suklian ng pag-aalala na hahantong sa pagkasira ng buhay.
PAGLALAHAD NG SULIRANIN Ang pananaliksik na ito ay naglalayong maipabatid sa mga mag – aaral ang epekto ng fraternity at sorority sa kanilang pag – aaral at naglalayong masagot ang mga sumusunod na mga katanungan:
1. Sinu – sino ang kalahok sa pag – aaral?
2. Anu – ano ang mga epekto ng fraternity at sorority sa mga sumusunod:
a) Kalusugan
b) Pag – aaral
c) Komunidad
d) Paaralan
3. Bakit sumasali ang mga estudyante sa mga organisasyong tulad ng fraternity at sorority?
KAHALAGAHAN NG PAG – AARAL Malaki ang maitutulong ng pag – aaral na ito sa mga sumusunod:
1) Administrasyon ng Paaralan o Unibersidad: Dahil sa pag – aaral na ito, matutuonang pansin ng administrasyon ang kalagayan ng mga estudyanteng sumasali sa fraternity at sorority.
2) Guro: Malalaman ng guro kung ano ang dapat gawin at kailangang imungkahe sa kanyang silid – aralan na may malaking ginagampanan sa paghubog ng mag –aaral.
3) Mag – aaral: Mabigyan ng babala ang mga mag – aaral tungkol sa masamang epekto ng fraternity at sorority. Magkaroon ng sapat na impormasyon tungkol sa fraternity at sorority at sa masamang epekto nito sa pag – aaral.
4) Magulang: Mapapatnubayan nila ang kanilang mga anak palayo sa mga masamang maidudulot ng fraternity. Habang maaga pa ay maisaisip na nila na ang pagsali sa mga ganitong organisasyon ay nakakasira ng buhay.
5) Komunidad: Mahalaga sa mga tao sa komunidad ang kapayapaan. Dahil sa pag – aaral na ito ay hindi lang ang mga guro, estudyante at mga magulang ang may karapatang malaman ang masamang epekto ng fraternity at sorority kundi pati na rin ang ibang tao sa komunidad.
KAUGNAY NA LITERATURA
Ang fraternity ay galing sa salitang Frater na ang ibig sabihin ay kapatiran, tinutukoy nito ang pormal na organisasyon at pagkakapatiran ng isang grupo.
Ang kaibahan ng fraternity sa ibang organisasyon ay ang implikasyon ng miyembro sa pagkakaroon ng malayang asosasyon at pantay-pantay na pagkakaroon ng benipisyal na layunin.
Noong una limitado lang ang fraternity sa mga lalaking miyembro ngunit habang tumatagal ay sumasali na ang mga babae at ngayon nga ay may tinatawag na tayong sorority na ang ibig sabihin ay pagkakapatiran ng mga kababaihan.
Ang fraternities ay pwedeng mabuo dahil sa maraming layunin at ang iba ay dahil sa mga tipikal na layunin kasama na dito ang edukasyon sa mga pamantasan, relihiyon, pulitika, at iba pa.