Asin, sa sariling bakuran, maaring anihin

Ang asin ang isa sa itinuturing na pinakaluma at pangkaraniwang pampalasa ng pagkain. Ito ay binubuo ng sodium at chloride at makukuha mula sa tubig dagat o deposito ng bato.
Ayon kay G. Jessie Delos Reyes, isang pangkaraniwang mamamayan na may masidhing pagmamahal at labis na paghanga sa kalikasan, napakasimple at kahit sino’y pwedeng umani ng asin basta’t may init mula sa araw at may availabale na tubig-dagat. “Kahit sa sarili mong bakuran, pwede kang umani ng asin o ‘solar salt’ ”, wika ni G. Jessie.
Ang dagat kasi ay kilala sa taglay nitong alat na may antas na 32-39 o Grade 5 salinity, alat na hindi sapat para maging asin kung matutuyo. Kailangan nitong maabot ang antas na alat na 80-100 o Grade 10 salinity para maging asin.
So, paano ito isinasagawa?
Sa pasimula, kailangan mong ihanda ang limang drum na magkakakonekta o magkakaugnay, ito ang pag-iimbakan ng tubig-dagat sa loob ng limang araw. Kapag naihanda na ang mga drum, iaayos o ihahanda naman ang ‘rock salt bed’ na yari sa tisa o binasag na palayok na dinikdik ng pinung pino. Dito ilalagak ang tubig-dagat upang patuyuin.
Proseso:
Sa unang araw, maglalagay ng tubig-dagat na nasa 32-39 antas ang alat sa unang drum. Hayaan ito doon sa loob ng 24 na oras. Ikalawang araw, bubuksan ang gripo patungo sa ikalawang drum at hayaan uli ito doon sa loob ng 24 na oras. UUlitin lamang ang prosesong ito sa loob ng limang araw. Pagdating ng ikalimang araw, inaasahang nasa 80-90 na ang antas ng alat o Grade 10 salinity ang nasabing tubig-dagat. Sa ikaanim na araw, narating na ng tubig-dagat ang 90-110 antas ng alat kaya maari na itong ilipat sa nakahandang ‘rock bed salt’ kung saan ito ay hahayaang matuyo sa loob ng isang araw upang anihin.
Ganyan lamang kasimple ang proseso sa pag-gawa ng asin. Sabi nga ni Kuya Jessie, kahit sa sarili mong bakuran makagagawa ka ng asin. Ang pormula: tubig-dagat + init ng araw = solar salt.